რამდენადაც ჩვენთვის ცნობილია, კუმურდოში სავარაუდო დანაშაულსაც ჰქონდა ადგილი, იყო შეხლა-შემოხლა, - ამის შესახებ სახალხო დამცველმა, უჩა ნანუაშვილმა სოფელ კუმურდოში განვითარებულ მოვლენებზე კომენტირებისას განაცხადა.

უჩა ნანუაშვილის თქმით, კუმურდოში განვითარებულ მოვლენებს მისი ოფისი სწავლობს და უფრო დეტალურ განცხადებას მოგვიანებით გააკეთებს.


„ჩვენ ვაპირებთ საქმის შესწავლას, მათ შორის ამ პროცესში რამდენად იყო დაცული უფლებები და მოგვიანებით გავაკეთებთ განცხადებას ამ საკითხზე. იქიდან გამომდინარე, რომ ჯერ ჩვენ სრული სურათი არ გვაქვს, რამდენადაც ჩვენთვის ცნობილია, სავარაუდო დანაშაულსაც ჰქონდა ადგილი, იყო შეხლა-შემოხლა. დაზიანდა ასევე რამდენიმე პოლიციელი და ავტომობილი. აქედან გამომდინარე, ჩვენთვის მნიშვნელოვანია, ყველა დეტალში გავერკვეთ და ამის შემდეგ გავაკეთოთ შესაბამისი განცხადება. ჩვენი ოფისი ახალქალაქში არის ჩართული უშუალოდ ამ პროცესის მონიტოტინგში“, - აღნიშნა სახალხო დამცველმა.

ახალქალაქში, სოფელ კუმურდოში სამართალდამცავებსა და ადგილობრივებს შორის დაპირისპირება მოხდა. შსს-ს ინფორმაციით, ადგილობრივი მოსახლეობის ჯგუფმა კულტურული მემკვიდრეობის ძეგლის ტერიტორიაზე შეჭრა სცადა. მე-10 საუკუნის ტაძარს, რომლის რესტავრაციაც მიმდინარეობს, შსს-ს დაცვის პოლიცია იცავს.

უწყების ცნობით, დაცვის პოლიციის თანამშრომლებმა მოქალაქეებს ტაძრის ტერიტორიაზე შეღწევის საშუალება არ მისცეს, რის შემდეგაც ადგილობრივი მოსახლეობის ნაწილი მათ ფიზიკურად დაუპირისპირდა, ადგილზე მისულ პოლიციას კი ქვები დაუშინეს.

შექმნილი ვითარების გათვალისწინებით, ადგილზე ჩავიდა შს მინისტრი გიორგი მღებრიშვილი, რომელიც ადგილობრივ მოსახლეობას შეხვდა.


მომხდარ ფაქტთან დაკავშირებით, გამოძიება საქართველოს სსკ-ს 353-ე პრიმა მუხლით, სსკ-ს 187-ე მუხლის 1 ნაწილით, სსკ-ს 239-ე მუხლის მე-2 და მე-3 ნაწილებით მიმდინარეობს.

შინაგან საქმეთა სამინისტროს ინფორმაციით, მომხდარის შემდეგ, რამდენიმე ადამიანი გამოკითხვაზე ჰყავდათ გადაყვანილი და ისინი უკვე გამოუშვეს.