„ერთიანი ნაციონალური მოძრაობა“ ეროვნულ ბანკს მოუწოდებს, „თი-ბი-სი ბანკის“ მიერ „პროგრესბანკის“ შესყიდვის საკითხი შეისწავლოს და მოხდეს მხარეების დაკითხვა, ხოლო პროკურატურისგან გამოძიების დაწყებას ითხოვს. განცხადება პარტიის ოფისში ოთარ სირაძემ გააკეთა.

ენმ-ის წევრის თქმით, საკითხთან დაკავშირებით „ნაციონალური მოძრაობისათვის“ ახალი დეტალები გახდა ცნობილი. კერძოდ, ოთარ სირაძის განცხადებით, როდესაც „რესპუბლიკა ბანკმა“ საქართველოს ბაზრის დატოვება გადაწყვიტა, არსებობდა წინასწარი შეთანხმება, რომ ის მსხვილ ჩინურ კერძო კონგლომერატს, „ჰუალინგ ჯგუფს“ უნდა შეეძინა, რომელიც საქართველოში უკვე ფლობდა „ბაზისბანკს“, თუმცა სირაძის მტკიცებით, ეს გარიგება ბიძინა ივანიშვილმა და კახა კალაძემ ჩაშალეს, რადგან „ბაზისბანკს“ აიძულებდნენ „პროგრესბანკის“ შესყიდვასაც.

„ჰუალინგ ჯგუფმა“ არ იყიდა კრიმინალური ისტორიით დამძიმებული ბანკი, რომლის ერთ-ერთი დამფუძნებელი, კალაძესთან ერთად, ფულის გათეთრების საქმეში ბრალდებული ილია გავრილოვია. სწორედ გამოძიების დაწყების შემდეგ გახდა აქტუალური „პროგრესბანკის“ გაყიდვის საკითხი, რათა კალაძე-ივანიშვილ-გავრილოვს მოეშორებინათ აღნიშნული ბანკი, თუმცა „ჰუალინგ ჯგუფმა“ „პროგრესბანკთან“ არ ისურვა საქმის დაჭერა, უკვე გარიგების ჩაშლის შემდეგ გამოჩნდა „თი-ბი-სი ბანკი“ მხსნელად“, -განმარტა სირაძემ.

„ნაციონალური მოძრაობის“ წევრი ფიქრობს, რომ „თი-ბი-სი ბანკს“ არ ჰქონდა არანაირი ბიზნესინტერესი „პროგრესბანკთან“ მიმართებით და ამიტომ საეჭვოა, რატომ გადაწყვიტა, „რესპუბლიკა ბანკთან“ ერთად, მისი შესყიდვა.