ბათუმი საგანმანათლებლო შეფასების საერთაშორისო ასოციაციის 43-ე საერთაშორისო კონფერენციას მასპინძლობს. ფორუმს 300-მდე უცხოელი დელეგატი ესწრება.

კონფერენციის მუშაობაში განათლების სისტემისა და საერთაშორისო ორგანიზაციების წარმომადგენლები, ასევე განათლების სფეროს ექსპერტები მონაწილეობენ.

43-ე საერთაშორისო კონფერენციის მთავარი თემაა „შეფასება, როგორც სოციალური ბერკეტი“. კონფერენცია შეფასებისა და გამოცდების ეროვნული ცენტრის ორგანიზებით ტარდება. ფინანსური მხარდამჭერები არიან „ათასწლეულის გამოწვევის ფონდი-საქართველო“ და „ათასწლეულის გამოწვევის კორპორაცია“.

მსოფლიოში საგანმანათლებლო მიმართულებით პრაქტიკულად ამაზე მნიშვნელოვანი კონფერენცია არ არსებობს და არ არის მარტივი მოიპოვო მასპინძლის უფლება. გარდა იმისა, რომ მოვისმენთ უცხოურ გამოცდილებებს, ჩვენც ქართულ მხარესაც ბევრი აქვს სათქმელი ჩვენი გამოცდილების შესახებ,-განაცხადა შეფასებისა და გამოცდების ეროვნული ცენტრის ხელმძღვანელმა მაია მიმინოშვილმა.

საგანმანათლებლო შეფასების საერთაშორისო ასოციაცია 1975 წელს დაარსდა და მასში გაერთიანებული 50-ზე მეტი ქვეყანა იუნესკოს საკონსულტაციო სტატუსით სარგებლობს.