„პატრიოტთა ალიანსის“ წევრები ადა მარშანია და ნატო ჩხეიძე მოსკოვში გაემგზავრნენ. ისინი შეხვედრას რუსეთის სახელმწიფო დუმის დეპუტატებთან და ფედერაციის საბჭოს დეპუტატებთან გეგმავენ. მათ ასევე გიორგი ლომია შეუერთდება.
ადა მარშანიას თქმით, მოსკოვში დაგეგმილია კიდევ ერთი მნიშვნელოვანი შეხვედრა, რომლის გასაჯაროება ამ დროისთვის არ მოხდება.
„მივემგზავრებით მხოლოდ ქალაქ მოსკოვში. დელეგაციის შემადგენლობა იგივეა, რაც იყო პირველი ვიზიტის დროს. ვხვდებით სახელმწიფო დუმის დეპუტატებს და ფედერაციის საბჭოს დეპუტატებს და კიდევ ერთი შეხვედრა გვაქვს ძალიან მნიშვნელოვანი, მაგრამ მე უფლება არ მაქვს გავასაჯაროო ჯერ. მთავარი სასაუბრო თემა, სადაც არ უნდა ჩავიდეთ და რასაკვირველია, პირველ რიგში მოსკოვში, იქნება ჩვენი ტერიტორიები, ჩვენი სოხუმი, ჩვენი ცხინვალი და ჩვენი ქვეყნის გამთლიანების უმძიმესი საკითხი“, - განაცხადა ადა მარშანიამ.
„პატრიოტთა ალიანსის“ წევრები მოსკოვში რამდენიმე დღეს დარჩებიან და თბილისში სავარაუდოდ 5 ოქტომბერს დაბრუნდებიან.
პარტიის წარმომადგენლები იმავე შემადგენლობით მოსკოვში მიმდინარე წლის ივლისშიც იმყოფებოდნენ.