ე.წ. რეფერენდუმის შედეგების შესრულება სავალდებულოა,- ეს განცხადება დღეს ბარსელონაში გამართული საგანგებო თათბირის შემდეგ კატალონიის მთავრობის მეთაურმა კარლეს პუიჩდემონმა გააკეთა.
მისივე თქმით, კატალონიის ესპანეთიდან გამოყოფის საკითხი კატალონიის პარლამენტმა უნდა გადაწყვიტოს. ამასთან, პუიჩდემონმა კატალონიიდან იმ ესპანელი პოლიციელებისა და ეროვნული გვარდიის გაყვანა მოითხოვა, რომლებიც მადრიდს ემორჩილებიან.
კატალონიის მეთაურმა ასევე მადრიდთან დიალოგის შესახებ გააკეთა განცხადება. მისი თქმით, ასეთი დიალოგი ამ ეტაპზე არ მიმდინარეობს და მხოლოდ იმ შემთხვევაში დაიწყება, თუ მადრიდი მოლაპარაკებებს ყველანაირი წინაპირობის გარეშე დათანხმდება.
შეგახსენებთ, რომ კატალონიაში ე.წ. რეფერენდუმი, მადრიდის წინააღმდეგობის მიუხედავად პირველ ოქტომბერს მაინც გაიმართა. ესპანეთის მთავრობამ განაცხადა, რომ ეს ქმედება უკანონო იყო და შესაბამისად გამოკითხვის შედეგების აღიარებას მადრიდი არ აპირებს.