კანადაში გამართულ საერთაშორისო თამაშებში, Invictus Games-ში („ძლიერთა თამაშები“) მონაწილე დაშავებული სამხედრო მოსამსახურეები საქართველოში დაბრუნდნენ.

სამხედრო მოსამსახურეებს თბილისის საერთაშორისო აეროპორტში საქართველოს თავდაცვის მინისტრი ლევან იზორია დახვდა, წარმატებით ასპარეზობა მიულოცა და მადლობა გადაუხადა.

„ჩვენს დაჭრილ სამხედრო მოსამსახურეებს მივულოცე დიდი გამარჯვება. მათ „ძლიერთა თამაშებში“ დაამტკიცეს, რომ ძლიერთა შორის უძლიერესები არიან და მოიპოვეს ოქროს მედლები. მათ გვიჩვენეს მაგალითი, თუ როგორ უნდა შეინარჩუნო სიცოცხლე, იბრძოლო იმისათვის, რომ შენი ქვეყნის ღირსება გაიტანო არამარტო საერთაშირისო მისიების შესრულების დროს, არამედ სპორტშიც. სრულიად საქართველოს და განსაკუთრებით თავდაცვის სამინისტრის სახელით, კიდევ ერთხელ ვულოცავ სპორტსმენებს ამ გამარჯვებას“, - განუცხადა თავდაცვის მინისტრმა ჟურნალისტებს.

კანადაში გამართულ „ძლიერთა თამაშებში“ სამხედროებმა მჯდომარე ფრენბურთში ოქროს მედლები მოიპოვეს. ფინალურ შეხვედრაში ქართველი სამხედროების ნაკრები გაერთიანებული სამეფოს ნაკრებს დაუპირისპირდა და დაძაბულ შეხვედრაში გამარჯვება მოიპოვა. Invictus Games​-ში გამარჯვებულ ქართველ სამხედროებს ოქროს მედლები დიდი ბრიტანეთის პრინცმა ჰარიმ პირადად გადასცა.

საბრძოლო მოქმედებებისა და საერთაშორისო სამშვიდობო მისიებში დაჭრილი და დაშავებული სამხედროებით დაკომპლექტებულმა 15-კაციანმა გუნდმა კანადაში გამართულ „ძლიერთა თამაშებში“ სპორტის ექვს სახეობაში იასპარეზა: ველორბოლა, ცურვა, წოლჭიმი, მშვილდით სროლა, ავტორბოლა, მჯდომარე ფრენბურთი. ქართველი სამხედრო მოსამსახურეები გაერთიანებული სამეფოს პრინცის, ჰარის პატრონაჟით გამართულ „ძლიერ თამაშებში“ მესამედ მონაწილეობდნენ.