სანდრო ბოტიჩელის „ვენერას“ ორიგინალი თბილისში დღეს სპეციალური რეისით, უსაფრთხოების ნორმების განსაკუთრებული დაცვით ჩამოიტანეს.
ფერწერული ტილო 1930 წლიდან ტურინის „გალერეა საბაუდას“ კოლექციის ნაწილია. ბოტიჩელის კიდევ ორი „ვენერაა“ შემორჩენილი, მათგან ერთი ბერლინის სამხატვრო გალერეაშია დაცული, ხოლო მეორე ჟენევაში კერძო კოლექციაში ინახება.
პროექტი ვენუს პუდიცა, რომლის ფარგლებშიც ნამუშევარი თბილისს სტუმრობს, განხორციელებულია ტურინის სამეფო მუზეუმებთან და კულტურული ასოციაცია „მეტამორფოზასთან“ თანამშრომლობით.
ბოტიჩელის ნამუშევრის ორიგინალი 5 ოქტომბრიდან 29 ნოემბრის ჩათვლით ეროვნულ გალერეაში ასევე იტალიელი მხატვრის, კარავაჯოს ნამუშევრების რეპროდუქციებთან ერთად იქნება წარმოდგენილი.
გამოფენა „ჩექ ინ ჯორჯიას“ ფარგლებში იმართება.