პარლამენტის თავმჯდომარე ირაკლი კობახიძე ვენეციაში გაემგზავრა, სადაც ვენეციის კომისიის პლენარულ სხდომას დაესწრება. ირაკლი კობახიძე ვიზიტის ფარგლებში ასევე, შეხვდება ვენეციის კომისიის პრეზიდენტს და კომისიის გენერალურ მდივანს. პარლამენტის თავმჯდომარის განცხადებით, მმართველი გუნდის მოლოდინები ვენეციის კომისიის საბოლოო დასკვნასთან დაკავშირებით საკმაოდ პოზიტიურია.
„მივემგზავრებით ვენეციაში ვენეციის კომისიის პლენარულ სხდომაზე დასასწრებად. მანამდე შეხვედრები გვექნება ვენეციის კომისიის პრეზიდენტთან და ასევე, მის გენერალურ მდივანთან. საუბარი რა თქმა უნდა, კონსტიტუციასთან დაკავშირებით, მესამე მოსმენით მიღებულ რედაქციასთან დაკავშირებით წარიმართება და საბოლოო ჯამში, ვისაუბრებთ იმ ტექსტზე, რომელიც დამტკიცდება ვენეციის კომისიის მიერ მის პლენარულ სხდომაზე. მოლოდინი არის პოზიტიურია, გამომდინარე იქიდან, რომ ჩვენ უკვე გვაქვს მიღებული წინასწარი დადებითი დასკვნა ჩვენს დოკუმენტთან დაკავშირებით და პლენარულ სხდომაზე საბოლოოდ დამტკიცდება ის დასკვნა, რომელიც იყო წარმოდგენილი. მხოლოდ მცირე ცვლილებები შეიძლება შევიდეს ამ დასკვნაში. აქედან გამომდინარე, მოლოდინი არის რა თქმა უნდა, პოზიტიური“, - განაცხადა ირაკლი კობახიძემ თბილისის საერთაშორისო აეროპორტში ვენეციაში გამგზავრებამდე.
როგორც ცნობილია, 6 ოქტომბერს ვენეციის კომისიის პლენარულ სხდომაზე საქართველოს საკონსტიტუციო ცვლილებების შეფასების საბოლოო დასკვნა უნდა დამტკიცდეს.