პრეზიდენტი მხოლოდ მმართველი გუნდის წინადადებას არ იღებს. საპარლამენტო უმრავლესობასთან გუშინდელი შეხვედრის შემდეგ ავლაბრის სასახლეში დღეს ოპოზიციონერი ლიდერები მივიდნენ.
მხარეები შეთანხმდნენ, რომ საკონსტიტუციო რეფორმაზე ვეტოს გამოყენების დროს გიორგი მარგველაშვილი მოტივირებულ შენიშვნებში ქართული ოცნების მიერ შეთავაზებული ორი წინადადების გარდა კიდევ ორ სადავო საკითხს ასახავს. იგულისხმება პრეზიდენტის არჩევის წესის შენარჩუნება და 2020 წელს მთლიანად პროპორციულ საარჩევნო სისტემაზე გადასვლა, რასაც ოპოზიცია პრინციპულ თემებად აცხადებს.
ახალ ოთხპუნქტიან შეთავაზებას პრეზიდენტის საპარლამენტო მდივანი სტრასბურგში წარადგენს, სადაც ხვალ ვენეციის კომისიის საბოლოო დასკვნა უნდა გამოქვეყნდეს. დიდი ალბათობით მმართველი გუნდი წინადადებას არ დათანხმდება და შესაბამისად მას ვეტოს დაძლევა მოუწევს.
ქეთი ქაშაკაშვილი გვეტყვის, ვინ რა დათმობაზე წავიდა პოლიტიკური კონსულტაციების შემდეგ.