ჩვენ ვაშენებთ სკოლებს და მშენებლობას უფრო მზარდი ტემპით გავაგრძელებთ, - ეს განცხადება განათლების მინისტრმა 61-ე საჯარო სკოლის გახსნაზე გააკეთა. “ჩემი მუშაობის ერთწლიან პერიოდში რამდენიმე ახალი სკოლა გავხსენი, რაც რა თქმა უნდა დიდი სიხარულია",- აღნიშნა ალექსანდრე ჯეჯელავამ.
"მინდა მთელს უბანს მივულოცო, რადგან ათასი სპეკულაცია იყო, ხან სასტუმრო შენდებაო, ხან კაზინოო და ათასი უბედურება, მაგრამ ჩვენ ვაშენებთ სკოლებს და სკოლების მშენებლობას სულ უფრო მზარდი ტემპით გავაგრძელებთ. ბოლო 25 წლის განმავლობაში სკოლები არ შენდებოდა, პირიქით, შენობები ინგრეოდა და სკოლების რაოდენობა მცირდებოდა. გარემო განათლების ხარისხისთვის გადამწყვეტია არ არის, თუმცა მასწავლებლებისთვის და მოსწავლეებისთვის მნიშვნელოვანია",- განაცხადა ჯეჯელავამ.
თანამედროვე სტანდარების 61-ე საჯარო სკოლა ალექსანდრე ჯეჯელავამ თბილისის მერთან და განათლების კომიტეტის თავმჯდომარესთან ერთად გახსნა. ახალი სკოლა ძველი სკოლის ადგილზე აშენდა და მის მშენებლობაზე 7 მილიონი ლარი დაიხარჯა.
61-ე საჯარო სკოლის ახალი შენობა გათბობის სისტემით, შიდა სპორტული და სააქტო დარბაზებით, ბიბლიოთეკით და საბუნებისმეტყველო კლას-კაბინეტითაა აღჭურვილი. ახალი შენობა სპეციალური საგანმანათლებლო საჭიროების მქონე მოსწავლეებისთვის ადაპტირებულია. მოეწყო პანდუსები, ლიფტი, როგორც მთავარ, ასევე სპორტული დარბაზის შესასვლელებში. სკოლის ექიმის კანინეტი და კვების ბლოკი ახალი ინვენტარით და ტექნიკით აღიჭურვა. 61-ე სკოლაში ამ ეტაპზე 1130 მოსწავლე ირიცხება.