სისხლის სამართლის საერთაშორისო სასამართლოს წარმომადგენლები თსუ-ში ლექციას მართავენ. ჰააგიდან ჩამოსული სტუმტები იურიდიული ფაკულტეტის სტუდენტებს რომის სტატუტის მნიშვნელობაზე, აგრეთვე ომისა და კაცობრიობის წინაშე ჩადენილი დანაშაულის გამოძიების სპეციფიკაზე ესაუბრებიან, მათ შორის საქართველო-რუსეთის კონტექსტშიც.
საერთაშორისო სასამართლო სისტემაში ჰააგის სასამართლოს როლზე კანცლერმა, ჰერმან ვონ ჰებელმა ისაუბრა. ომით დაზარალებულებისთვის შექმნილ ნდობის ფონდზე კი ინფორმაცია სტუდენტებს ფონდის დირექტორმა, პიტერ დე ბაანმა გააცნო.
ლექციას სახალხო დამცველი და იურიდიული ფაკულტეტის პროფესორებიც ესწრებიან, რომლებმაც სტუდენტებს მისასალმებელი სიტყვით მიმართეს. ლექციის შემდეგ დელეგაცია შემაჯამებელ პრესკონფერენციას გამართავს ,სადაც საქართველოში ვიზიტს შეაჯამებს და მედიას სამომავლო ნაბიჯებს გააცნობს. დელეგაციის ვიზიტი ოფიციალურად ამით დასრულდება.
ჰააგის წარმომადგენლობა თბილისში 2018 წლის იანვარში გაიხსნება, დაზარალებულების დასახმარებლად კი ნდობის ჯგუფი დაიწყებს მუშაობას. ამის შესახებ დელეგაციის წევრებმა, ორი დღის წინ, მედიასთან შეხვედრაზე განაცხადეს.