რელიგიის საკითხთა სახელმწიფო სააგენტოსთან არსებულმა რელიგიურ გაერთიანებათა ქონებრივი და ფინანსური საკითხების შემსწავლელმა კომისიამ ცხრა რელიგიური ორგანიზაციისთვის ქონების გადაცემის საკითხები განიხილა.

საბჭომ მართლმადიდებლური ეკლესიის 17 შუამდგომლობიდან 16 დააკმაყოფილა. ასევე, ლუთერულ ეკლესიას, რომელიც საქართველოში დაახლოებით 200 წელია არსებობს, თბილისში მიწის ნაკვეთი გადაეცა საკუთრებაში, სადაც გერმანული სასაფლაო და ეკლესიაცაა განთავსებული.

დადებითად გადაწყდა იეზიდთა თემის სასულიერო საბჭოს შუამდგომლობაც. მათ ლოტკინზე, იეზიდთა სასაფლაოს მიმდებარედ 350 კვ. მეტრი ფართობი გადაეცათ სალოცავის ასაშენებლად.

საბჭომ დადებითი გადაწყვეტილება მიიღო კათოლიკური ეკლესიის სასარგებლოდაც. მათ რუსთავში ადგილმონაცვლეობით 500 კვადრატული მიწის ნაკვეთის სანაცვლოდ ახალი ტერიტორია გადაეცათ, რომელიც 1200 კვადრატულ მეტრს მოიცავს.

მუსლიმთა სამმართველოსთვის მოხდა 10 მეჩეთის სარგებლობაში გადაცემა, რომლებიც, ძირითადად, დასავლეთ საქართველოშია განლაგებული.

რაც შეეხება სომხურ ეკლესიას, მათი ორი შუამდგომლობიდან ერთი ნაწილობრივ დაკმაყოფილდა, ერთს კი უარი ეთქვა არასრული დოკუმენტაციის წარმოდგენის გამო.