საკრებულოს თანამდებობის პირთა ბიზნესთან კავშირი, მუნიციპალური ქონების გადაცემა, გამჭვირვალობისა და ანგარიშვალდებულების დაბალი ხარისხი, - ეს ის პრობლემური ტენდენციებია, რომელიც საერთაშორისო გამჭვირვალობა საქართველოს მიერ საკრებულოს საქმიანობასთან დაკავშირებით მომზადებულ ანგარიშშია გამოკვეთილი.

როგორც კვლევის ავტორები აცხადებენ, საკრებულოს 24 თანამდებობის პირიდან 10 თანამდებობის პირს აქვს კავშირი ბიზნესთან.

მათვე ინფორმაციით, პრობლემურია საკრებულოს თანამდებობის პირების მიერ არადეკლარირებული ბიზნეს წილები.

"წილების საკუთრება არ აქვს დეკლარირებული საკრებულოს ხუთი თანამდებობის პირს: გიორგი ტყემალაძე, გიორგი ახვლედიანი, გიორგი მუსხელიშვილი, ლია ჯავახაძე, გულიკო ზუმბაძე. არასრულად არის დეკლარირებული საკრებულოს ორი თანამდებობის პირის წილის საკუთრება: ვლადიმერ ძნელაძე, ლევან დარახველიძე. ასევე კომერციული იურიდიული პირების ხელმძღვანელობა საკრებულოს წევრის სტატუსთან შეუთავსებელ საქმიანობას წარმოადგენს. რეესტრის მონაცემებით, დირექტორად რეგისტრირებულია საკრებულოს სამი თანამდებობის პირი: გიორგი ტყემალაძე, ლევან დარახველიძე და ლია ჯავახაძე”- განაცხადა "საერთაშორისო გამჭვირვალობა საქართველოს"საპარლამენტო მდივანმა ლიკა საჯაიამ.

რაც შეეხება ქონების გადაცემის საკითხს, საკრებულომ თბილისის მთავრობას 58 შემთხვევაში მისცა თანხმობა ფიზიკური პირის, ან კერძო სამართლის იურიდიული პირისთვის ქონების გადაცემის თაობაზე.

"საანგარიშო პერიოდში საკრებულომ თანხმობა მისცა ქალაქ თბილისის მერიას ეკლესიისთვის საერთო ჯამში 183,414,00 კვ.მ მეტრის ფართობის გადაცემაზე. უძრავი ქონება პირდაპირი განკარგვის ფორმით გადაეცა-28 შემთხვევაში სიმბოლურ ფასად ერთ ლარად. პრობლემურია საკრებულოს საქმიანობასთან დაკავშირებული მნიშვნელოვანი ინფორმაცია, პრაქტიკულად არ ქვეყნდება. გაუმჯობესებას საჭიროებს საკრებულოს მიერ საზედამხედველო ფუნქციის განხორციელება", - აცხადებენ კვლევის ავტორები.

რაც შეეხება კვლევაში ასახულ დადებით ტენდენციებს, ეს ეხება საკრებულოში ჩატარებულ 200 სხდომას, რომელთაგან კვორუმის არარსებობის გამო, არც ერთი სხდომა არ ჩაშლილა.

მათი თქმით, დამტკიცდა სამი მნიშვნელოვანი დოკუმენტი: გენდერული, გარემოსდაცვითი და მარკეტინგის სტრატეგიები, ასევე დამტკიცდა დედაქალაქის მიწათსარგებლობის გენერალური გეგმა.

"საკრებულოს წინაშე ანგარიშვალდებული თანამდებობის პირები, უმეტეს შემთხვევაში საკრებულოს მოთხოვნით ესწრებოდნენ საკრებულოს სხდომებს", - განაცხადა საჯაიამ.

რაც შეეხება რეკომენდაციებს, როგორც კვლევის ავტორები აცხადებენ, მნიშვნელოვანია მომდევნო მოწვევის საკრებულოში გადაწყვეტილების მიღების პროცესი მათ შორის ქონების გადაცემასთან დაკავშირებით, იყოს უფრო ღია, გამჭვირვალე და დასაბუთებული, ხოლო საკრებულო მეტად ეფექტურად იყენებდეს კანონმდებლობით განსაზღვრულ კონტროლის მექანიზმს.