საქართველოში ვიზიტით ევროკავშირის საბჭოს პოლიტიკური და უსაფრთხოების კომიტეტის წევრი ელჩები იმყოფებიან. დღეს PSC-ის ელჩები, ვოლტერ სტივენსის ხელმძღვანელობით, საქართველოს თავდაცვის მინისტრს შეხვდნენ.
ლევან იზორიამ სტუმრებს საქართველოს თავდაცვის უწყებაში განხორციელებულ და მიმდინარე რეფორმებზე ინფორმაცია მიაწოდა. საუბარი შეეხო საქართველოსა და რეგიონის უსაფრთხოების გარემოს და არსებული გამოწვევების ფონზე, რეგიონული უსაფრთხოების მნიშვნელობას. ლევან იზორიამ ამ მხრივ ევროკავშირის მხარდაჭერასა და ევროპულ ინსტიტუტებთან თანამშრომლობის გაღრმავებაზე გაამახვილა ყურადღება.
მინისტრის განცხადებით, ელჩებმა დადებითად შეაფასეს ის რეფორმები, რაც აბსოლუტურ თანხვედრაშია ევროკავშირის გლობალური უსაფრთხოების სტრატეგიასთან, ნატოს მიერ განსაზღვრულ ძირითად სტრატეგიულ მიმართულებებთან.
ევროკავშირის დელეგაციის წევრებმა მინისტრსა და ქართულ მხარეს მსოფლიოს უსაფრთხოების უზრუნველყოფის პროცესში საქართველოს კონტრიბუციის, საერთაშორისო სამშვიდობო მისიებში აქტიური ჩართულობისა და კონკრეტულად, ცენტრალური აფრიკის რესპუბლიკაში ევროკავშირის ეგიდით მიმდინარე მისიაში მონაწილეობისთვის მადლობა გადაუხადეს.
PSC-ის ელჩებთან შეხვედრაზე საქართველოს ოკუპირებულ რეგიონებში არსებულ ვითარებაზეც იმსჯელეს და ევროკავშირის სადამკვირვებლო მისიის (EUMM) მნიშვნელოვანი საქმიანობა აღნიშნეს. შეხვედრას თავდაცვის მინისტრის პირველი მოადგილე, ლელა ჩიქოვანი, გენერალური შტაბის უფროსი, გენერალ-მაიორი ვლადიმერ ჩაჩიბაია და მისი პირველი მოადგილე, პოლკოვნიკი ნიკოლოზ ჯანჯღავა, ასევე, საქართველოში ევროკავშირის ელჩი, იანოშ ჰერმანი დაესწრნენ.