ბათუმში, ევროპის მოედანზე დღეს სოფლის ტურიზმის ფესტივალი „განდაგანა“ იწყება. ორი დღის განმავლობაში ფესტივალის სტუმრებს საშუალება ექნებათ მთიან აჭარაში ბათუმიდან გაუსვლელად იმოგზაურონ.

მოედანზე სოფლის პეიზაჟის იდენტური დეკორაციები მოეწყო. გამოიფინება აჭარის ყველა მუნიციპალიტეტისთვის დამახასიათებელი სოფლის პროდუქტები, ადგილზე მომზადდება აჭარული ტრადიციული კერძები, გამოიფინება ხელნაკეთი ნივთები და დამთვალიერებელთან ერთად მოედანზევე დაიწურება ღვინოც.

სტუმრებს საშუალება ექნებათ ჩაერთონ მხიარულ შეჯიბრებებსა და მასტერკლასებში. გაიმართება განდგანას ცეკვისა და კულინარიული მასტერკლასი, დამთვალიერებელს საშუალება ექნება უშუალოდ ჩაერთოს ჩურჩხელის ამოვლების, ჭაჭის გამოხდის, გოგრებით სოფლის ბოულინგში, შეშის დაჩეხვაში, სინორისა და ბორანოს მომზადებაში. კონკურსის გამარჯვებულები ნატურალური პროდუქტებით დაჯილდოვდებიან.

ორი დღის განმავლობაში 16:00 საათიდან 20:30 საათამდე, ფოლკლორ შოუებს სტუმრებს ადგილობრივი ფოლკლორული ბენდები „ბერმუხა“, „ბათუმი“, “ფესვები“, „შავფაროსნები“, „ელესა“, “ქობულეთი“, „მაჭახელა“ და „ათძალი“ წარმოუდგენენ. 6 ოქტომბერს ფესტივალს ბენდი „ლურჯი იალქანი, 7 ოქტომბერს კი ჯგუფი „ფრანი“ დაასრულებს.