ხვალ, 8 ოქტომბერს, თბილისს მოლდოვის, უკრაინისა და აზერბაიჯანის საგარეო საქმეთა მინისტრები ეწვევიან. ქვეყნები სუამის ფორმატის დაარსების 20 წლის იუბილეს საგანგებოდ აღნიშნავენ. თარიღთან დაკავშირებით ხვალ თბილისში მინისტრთა სხდომა გაიმართება, რის შემდეგაც, მჭირდო თანამშრომლობის შესახებ ერთობლივ კომუნიკეს მოეწერება ხელი.

„ჩვენ აღვნიშნავსთ წელს 20 წლისთავს სუამის ინიციატივის დაწყებიდან და ველოდებით საქართველოში ჩემს სამ კოლეგას: მოლდოვის, უკრაინისა და აზერბაიჯანის საგარეო საქმეთა მინისტრებს და მათთან ერთად ამ მნიშვნელოვანი ორგანიზაციის 20 წლისთავის აღნიშვნას,“,- განაცხადა საგარეო საქმეთა მინისტრმა მიხეილ ჯანელიძემ.

წელს საქართველო დემოკრატიული და ეკონომიკური განვითარების ორგანიზაციის თავმჯდომარე ქვეყანა გახდა, სწორედ ამასთან დაკავშირებით, უკვე წლის ბოლოს საპარლამენტო ასამბლეის პლენარული სესიის მოწვევა იგეგმება, - ამის შესახებ პირველ არხს საპარლამენტო ასამბლეის თავმჯდომარემ, დეპუტატმა, კახა კუჭავამ განუცხადა.

„20 წლის განმავლობაში ძალიან მნიშვნელოვანი შედეგი დაიდო სხვადასხვა სექტორის მიმართულებით: ტურიზმი, ტრანსპორტი, კულტურა, სამართალი, საერთაშორისო დანაშაულთან ბრძოლის სფერში და ა.შ. მნიშვნელოვანია ისიც, რომ 2017 წლის პირველი იანვრიდან საქართველო გახდა თავმჯდომარე ქვეყანა. ამ ფაქტთან დაკავშირებით წლის ბოლოს უკვე საპარლამენტო ასამბლეის კუთხით იგეგმება საპარლამენტო ასამბლეის პლენარული სესია და ძალიან მნიშვნელოვანია, რომ ამ კუთხით მხარდაჭერა გვაქვს იმ საერთაშორისო ორგანიზაციების დელეგაციის, რომლებიც მას დაესწრებიან. ესენი იქნებიან ბალტიის ასამბლეა, ნორდიკული საბჭო, ბენელუქსის პარლამენტი და ა.შ.“-აღნიშნა ასამბლეის თავმჯდომარემ.

სუამის ქვეყნების მინისტერიალი ერთდღიანია და იგი 8 ოქტომბერს დასრულდება.