კონგოში გაუჩინარებული ქართველი მფრინავის, სოსო ოსორაულის ოჯახი ხელისუფლებას უმოქმედობაში ადანაშაულებს.
ოსორაულის ოჯახის წევრები საგარეო საქმეთა სამინისტროსთან აქციას მართავენ. ისინი საგარეო უწყებისგან დამატებითი განმარტებებისა და მტკიცებულებების წარმოდგენას ითხოვენ, რათა დარწმუნდნენ, არის თუ არა ქართველი მფრინავი ნამდვილად დაღუპული.
მფრინავის ოჯახის წევრები საგარეო საქმეთა სამინისტროს მიერ გავრცელებულ ინფორმაციას არ ენდობიან და აცხადებენ, რომ ფოტომასალა, რომელიც ოჯახს აჩვენეს, შესაძლებელია დამონტაჟებული იყოს.
სოსო ოსორაულის ძმის განცხადებით, ისინი საგარეო საქმეთა სამინისტროსგან ქმედითი ნაბიჯების გადადგმას მოითხოვენ.
ოსორაულის მეუღლის თქმით, საგარეო საქმეთა სამინისტროსთან ოჯახს ოთხი დღის წინ სატელეფონო კავშირი ჰქონდა. მისივე ინფორმაციით, უწყებამ ოჯახს განუცხადა, რომ ბოლო მონაცემებით, რომელსაც საგარეო საქმეთა სამინისტროს გაერო აწვდის, ქართველი მფრინავი გარდაცვლილია.