ყველა საერთაშორისო ფორმატის გამოყენება ჩვენთვის სასიცოცხლოდ მნიშვნელოვანია, რათა დაფიქსირდეს, რომ რუსეთი არღვევს საერთაშორისო სამართლის ნორმებს, - ამის შესახებ საქართველოს თავდაცვის მინისტრმა ლევან იზორიამ ჟურნალისტებს ნატო-ს საპარლამენტო ასამბლეის 63-ე სესიასთან დაკავშირებით განუცხადა, რომელიც ბუქარესტში იმართება.

მისი თქმით, რუსეთმა მოახდინა ქვეყნის ტერიტორიის 20%-ის ოკუპაცია და საერთაშორისო საზოგადოების აქტიური ჩართულობით, პრინციპული პოზიციით ყველა ტრიბუნა უნდა გამოვიყენოთ, მათ შორის, როგორიცაა ნატო-ს საპარლამენტო ასამბლეა.

„ყველა საერთაშორისო ფორმატის გამოყენება ჩვენთვის სასიცოცხლოდ მნიშვნელოვანია, რათა დაფიქსირდეს, რომ რუსეთი არღვევს საერთაშორისო სამართლის ნორმებს. რუსეთმა მოახდინა ჩვენი ქვეყნის ტერიტორიის 20%-ის ოკუპაცია და ვფიქრობ, სწორედ საერთაშორისო საზოგადოების აქტიური ჩართულობით და პრინციპული პოზიციით ყველა ტრიბუნა უნდა იქნეს გამოყენებული, მათ შორის, როგორიცაა ნატო-ს საპარლამენტო ასამბლეა. უნდა მოხდეს ჩვენი და ჩვენი პარტნიორი ქვეყნების კონსოლიდაცია, რომ აღდგეს ტერიტორიული მთლიანობა, რადგან მთელმა მსოფლიომ იცხოვროს წესებზე დაფუძნებულ მსოფლიოში, სადაც პატივს სცემენ ადამიანის უფლებებს, ქვეყნების ტერიტორიულ მთლიანობას და სუვერენიტეტს, სადაც საზღვრები არის საერთაშორისო ნორმებით აღიარებული“, - განაცხადა ლევან იზორიამ.

რუმინეთის დედაქალაქში, ნატო-ს საპარლამენტო ასამბლეის 63-ე სესია გრძელდება. შეხვედრას 50 ქვეყნის, მათ შორის საქართველოს დელეგაციაც ესწრება.

რეზოლუციის საბოლოო ტექსტზე მუშაობა ამ წუთებში მიმდინარეობს. განხილვის ერთ-ერთი მთავარი თემა რუსეთის აგრესიული პოლიტიკაა, რაც რეგიონისა და მისი მეზობლების უსაფრთხოებას უშლის ხელს. ასამბლეაზე დეპუტატებმა სპეციალური ანგარიში წარადგინეს, სადაც შავი ზღვის უსაფრთხოებაზეა ყურადღება გამახვილებული.

მოხსენებაში საუბარია საქართველოზეც. დიდი ნაწილი კი ოკუპირებულ აფხაზეთს ეთმობა. რეზოლუციას ასამბლეა ხვალ დაამტკიცებს.

ხვალვე მოხსენებით ნატო-ს გენერალური მდივანი იენს სტოლტენბერგი გამოვა.