იუსტიციის სამინისტროში თავისუფალი და სამართლიანი არჩევნებისთვის უწყებათაშორისი კომისიის მე-8 სხდომა გაიმართა. სხდომა იმ ინფორმაციაზე საუბრით დაიწყო, რომლის თანახმად, დმანისში მოსახლეობას მხარდაჭერისთვის ყურანზე დაფიცებას სთხოვენ.
იუსტიციის მინისტრმა მთავარი პროკურორის მოადგილეს ამ საკითხის პირად კონტროლზე აყვანა დაავალა.
უწყებათაშორისმა კომისიამ პოლიტიკური პარტიების და არასამთავრობო ორგანიზაციების მიერ შემოტანილი განცხადებები განიხილა, რომელიც შესაძლო დარღვევებს ეხება. საუბარია როგორც მმართველი პარტიის, ასევე ოპოზიციური ძალების მხრიდან შესაძლო კანონდარღვევებზე.
მათ შორის არის ადმინისტრაციული რესურსის გამოყენება, ზეწოლა, აგიტაციის წესების დარღვევის და ძალადობის შემთხვევები. ამ შემთხვევებს შორის არის საბავშვო ბაღების პედაგოგების შესაძლო მონაწილეობის საკითხი მმართველი პარტიის თბილისის მერობის კანდიდატის წინასაარჩევნო შეხვედრებში. იუსტიციის მინისტრის განმარტებით, ყველა შესაძლო დარღვევის ფაქტზე აუცილებლად მოხდება სათანადო რეაგირება.
უწყებათაშორისი კომისიის სხდომა პროტესტის ნიშნად დატოვა ნაციონალური მოძრაობის წევრმა თინა ბოკუჩავამ. მისი თქმით, კომისია მხოლოდ ფორმალური ხასიათისაა და მათი პარტია უსაგნო შეხვედრებში მონაწილეობას არ აპირებს.