ცენტრალური საარჩევნო კომისიის თავმჯდომარე თამარ ჟვანია ევროკავშირის ელჩს საქართველოში იანოშ ჰერმანს შეხვდა.
შეხვედრა ცესკო-ში, დახურულ კარს მიღმა, თითქმის ერთ საათს გაგრძელდა.
შეხვედრის დასრულების შემდგ თამარ ჟვანიამ განაცხადა, რომ ორი მნიშვნელოვანი გზავნილი მიიღეს ელჩისგან, პირველი ის, რომ ევროკავშირი ყურადღებით ადევნებს თვალს საარჩევნო პროცესის მიმდინარეობას და მეორე - ისინი მხარდაჭერას უცხადებენ საარჩევნო ადმინისტრაციის საქმიანობას.
"ვისაუბრეთ ყველა იმ პროცესზე, რომელიც საარჩევნო ადმინისტრაციაში მიმდინარეობს და იმაზე, თუ როგორია ჩვენი მომზადების დონე. საუბარი იყო კონკრეტულ გამოწვევებზეც, რომელიც შემცირებულია, მაგალითად ადმინისტრაციული რესურსების გამოყენების გარკვეულ ფაქტებზე, რომელზეც საარჩევნო ადმინისტრაციამ უკვე შეადგინა სამართალდარღვევის ოქმები და რიგ შემთხვევებში სასამართლომაც დაადასტურა სამართალდარღვევის ფაქტები", - განაცხადა თამარ ჟვანიამ.
მისი თქმით, ჯამში ელჩის მიერ საკმაოდ პოზიტიურად იქნა შეფასებული საარჩევნო ადმინისტრაციის მუშაობა.