საქართველოს პრეზიდენტმა გიორგი მარგველაშვილმა საკონსტიტუციო ცვლილებების პროექტს ვეტო დაადო. ამის შესახებ განცხადება პრეზიდენტმა დღეს გააკეთა.
საპარლამენტო უმრავლესობა პრეზიდენტს სთავაზობდა, ვეტო დაედო საკონსტიტუციო ცვლილებების მხოლოდ იმ ნაწილისთვის, სადაც საუბარი იყო ბლოკების ერთჯერადად შემოღებასა და ე.წ. ბონუსების სისტემაზე.
თუკი პრეზიდენტი მოტივირებულ შენიშვნებში მმართველი გუნდის მიერ შეთავაზებულ ორ საკითხს შეეხებოდა, უმრავლესობა ვეტოს არ დაძლევდა. მათთვის მისაღები იყო კონსტიტუციაში მხოლოდ ბლოკებთან და ბონუსთან დაკავშირებით შესწორება, ოპოზიცია კი კიდევ ორი საკითხის დამატებას ითხოვდა, რაც პროპორციულ საარჩევნო სისტემაზე 2020 წელს გადასვლას და პრეზიდენტის არჩევის წესის უცვლელად დატოვებას გულისხმობდა, ვიდრე პარლამენტი ორპალატიანი არ გახდებოდა.
პარლამენტმა საკონსტიტუციო ცვლილებები მესამე მოსმენით 26 სექტემბერს დაამტკიცა და დოკუმენტი ხელმოსაწერად პრეზიდენტს გადაეგზავნა.
წინასწარი ინფორმაციით, ვეტოს დაძლევაზე პარლამენტი 13 ოქტომბერს იმსჯელებს.