ბელგრადში, სტადიონ „რაიკო მიტიჩზე“ სერბეთისა და საქართველოს ეროვნული საფეხბურთო ნაკრებების მატჩი დასრულდა.

მსოფლიოს 2018 წლის საფეხბურთო ჩემპიონატის შესარჩევი ციკლის ბოლო შეხვედრაში „ჯვაროსნებმა“ ბალკანელებს დიდი წინააღმდეგობა გაუწიეს, პირველ ტაიმში კარში დარტყმების სტატისტიკით მასპინძლებს აჯობეს კიდეც, მაგრამ საქმე გოლამდე ვერ მიიყვანეს და პირველი ნახევარი 0:0 დაასრულეს.

მეორე ტაიმში სერბებმა ზეწოლა გააძლიერეს. მართალია, მიტროვიჩისა და მატიჩის დარტყმების შემდეგ საქართველო მეკარემ მაკარიძემ და კანკავამ აშკარა გოლებისგან იხსნეს, მაგრამ მასპინძლებმა სტუმრების წინააღმდეგობა მაინც დაძლიეს და 74-ე წუთზე ანგარიში პრიოვიჩმა გახსნა 1:0. საბოლოოდ, შეხვედრა ასეც დასრულდა.

სერბეთმა 21 ქულა დააგროვა, ჯგუფში პირველ ადგილზე გავიდა და მსოფლიოს 2018 წლის საფეხბურთო ჩემპიონატზე მონაწილეობის უფლება მოიპოვა. მეორე პოზიცია ირლანდიამ დაიკავა, რომელმაც კარდიფში პარალელურად მიმდინარე შეხვედრაში უელსს 1:0 მოუგო, 19 ქულა დააგროვა და ევროპის ჩემპიონატის პლეიოფის მატჩებში მონაწილეობის უფლება მოიპოვა. ავსტრიამ კიშინიოვში მოლდოვას 1:0 სძლია და მე-4 ადგილი დაიკავა.

ამგვარად, საქართველომ ჯგუფური ტურნირი გამარჯვების გარეშე, ხუთი ქულით დაასრულა და მეხუთე ადგილი დაიკავა – „ჯვაროსნებმა“ მხოლოდ ორი ქულის მქონე მოლდოვას გაასწრეს.