უნგრეთის საგარეო საქმეთა მინისტრს, პეტერ სიიარტოს უკრაინასა და ევროკავშირს შორის ასოცირების შეთანხმების გადახედვა სურს.
„რადიო თავისუფლების“ უკრაინული განყოფილების ინფორმაციით, ამის შესახებ მინისტრმა უკრაინის ქალაქ უჟგოროდში ვიზიტისას განაცხადა, სადაც ის ადგილობრივ მცხოვრებ უნგრელებს შეხვდა.
სიიარტო მიიჩნევს, რომ უკრაინის მიერ მიღებული განათლებს კანონი ასოცირების შეთანხმების პრინციპებს არღვევს, ამიტომ ის მომავალ ორშაბათს ლუქსემბურგში, ევროკავშირის წევრი ქვეყნების საგარეო საქმეთა მინისტრების შეხვედრაზე აღნიშნული შეთანხმების გადახედვის ინიციატივით გამოვა.
უკრაინაში მცხოვრებ უნგრელებთან შეხვედრის შემდეგ, მინისტრმა განაცხადა, რომ ახალი კანონი შეუძლებელს ხდის უკრაინაში უნგრული სკოლების საქმიანობას და ეთნიკურ უმცირესობებს მათ მშობლიურ ენაზე განათლების მიღების საშუალებას ართმევს. მინისტრი მიიჩნევს, რომ ამგვარად კიევი საერთაშორისო ვალდებულებებს არღვევს.
პეტერ სიიარტო კიევზე საერთაშორისო ზეწოლის განხორციელებას ითხოვს.
ახალი კანონი უკრაინაში განათლების რეფორმას ითვალისწინებს. კერძოდ, ქვეყანა გადადის 12-წლიან საშუალო განათლებაზე. დოკუმენტის თანახმად, სასწავლო დაწესებულებებში განათლების პროცესი სახელმწიფო ენაზე უნდა ჩატარდეს. კანონმა უკრაინის მეზობელი სახელმწიფოების - რუმინეთის, პოლონეთის, უნგრეთისა და მოდლოვის მწვავე კრიტიკა გამოიწვია.