დღეს საფრანგეთში საყოველთაო გაფიცვა იმართება. გაფიცვა ორგანიზებულია საფრანგეთის ცხრა პროფკავშირის მიერ, რომლებიც 5,4 მილიონ საჯარო მოხელეს აერთიანებს.

როგორც სააგენტო Reuters-ი იტყობინება, ეს საფრანგეთში ბოლო ათი წლის განმავლობაში პირველი შემთხვევაა, როდესაც საჯარო სექტორში დასაქმებულებს გაფიცვისკენ ქვეყნის ცხრავე პროფკავშირი ერთდროულად მოუწოდებს.

საპროტესტო აქციის მონაწილეები მთავრობის რეფორმის წინააღმდეგ გამოდიან, რომელიც 120 000 სამუშაო ადგილის შეკვეცასა და ავადმყოფობის გამო, ანაზღაურებადი შვებულების შემცირებას ითვალისწინებს.

დღეს საფრანგეთში დახურული იქნება სკოლები, საავადმყოფოები, არ იმუშავებს საზოგადოებრივი ტრანსპორტი. გაფიცვის გამო, გაუქმდა ასობით ავიარეისი. ქვეყნის მთელ ტერიტორიაზე 160-მდე დემონსტრაციაა დაგეგმილი.