25 პირს შორის, რომელთა ცხედრებიც იდენტიფიცირებული და გადმოსვენებულია, არიან ის ადამიანები, რომლებიც ბოლო წუთამდე იცავდნენ საქართველოს ერთიანობას და დამოუკიდებლობას, რომლებსაც ყველანაირი შანსი ჰქონდათ, თავი გადაერჩინათ, მაგრამ მათ არჩიეს, ბოლო წუთამდე ყოფილიყვნენ თავიანთ პოსტზე და ბოლო წვეთამდე იბრძოლეს სამშობლოსთვის და მისი დამოუკიდებლობისათვის, - ამის შესახებ ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა, სოზარ სუბარმა მთავრობის დღევანდელი სხდომის შემდეგ განაცხადა.

სუბარის ინფორმაციით, ერთი წლის განმავლობაში 28 სამარხი იქნა გახსნილი და 91 ნეშტი მოძიებული, მათ შორის 25 კი უკვე იდენტიფიცირებულია. დევნილთა და განსახლების მინისტრის თქმით, მათ შორის არიან ის ადამიანები, რომლებიც სოხუმში უზენაესი საბჭოს შენობას ჟიული შარტავასთან ერთად იცავდნენ.

„ახალი 25 ნეშტი არის იდენტიფიცირებულ და გადმოსვენებული. ზოგადად, უგზო-უკვლოდ დაკარგულთა მოძიების და გადმოსვენების პროცესი ძალიან კარგი ტემპით მიდის, რისთვისაც მადლობა მინდა ვუთხრა წითელი ჯვრის საერთაშორისო კომიტეტს დახმარებისთვის და ასევე განსაკუთრებული მადლობა მინდა ვუთხრა აფხაზურ მხარეს, რომლებიც მართლა ყველაფერს აკეთებენ იმისათვის, რომ პროცესი ძალიან პოზიტიურად და დინამიურად წავიდეს. წინა წლების განმავლობაში, მთლიანად, მოხდა 101 პირის გადმოსვენება და იდენტიფიცირება, მათი ნეშტები გადაცემულია ოჯახებს. მხოლოდ ერთი წლის განმავლობაში 28 სამარხი იქნა გახსნილი და 91 ნეშტი იქნა მოძიებული, მათ შორის 25 უკვე იდენტიფიცირებულია. ამ 25-დან ყველანი არიან გმირები, მაგრამ მათ შორის არიან ის ადამიანები, რომლებიც სოხუმში უზენაესი საბჭოს შენობას იცავდნენ ჟიული შარტავასთან ერთად. მათ შორის არის მამია ალასანია, საქართველოს უშიშროების პოლკოვნიკი, სოხუმის მერი, საქართველოს გმირი გურამ გაბესკირია, ასევე აფხაზეთის მინისტრთა საბჭოს თავმჯდომარის მოადგილეები შალვა შენგელია და ვახტანგ გეგელაშვილი. მათ შორის არიან ის ადამიანები, რომლებიც ბოლო წუთამდე იცავდნენ საქართველოს ერთიანობას და დამოუკიდებლობას, რომლებსაც ყველანაირი შანსი ჰქონდათ, თავისი თავი გადაერჩინათ, მაგრამ მათ არჩიეს, ბოლო წუთამდე ყოფილიყვნენ თავიანთ პოსტზე და ბოლო წვეთამდე იბრძოლეს სამშობლოსთვის და მისი დამოუკიდებლობისათვის“, - აღნიშნა სუბარმა.

დევნილთა მინისტრის თქმით, ცხედრების იდენტიფიცირება მაღალტექნოლოგიური კვლევებით და დნმ-ის ანალიზით მოხდა.

„იყო სხვადასხვა ძალიან წინააღმდეგობრივი ინფორმაცია. დიდი ხნის წინ გვქონდა ინფორმაცია, თითქოს სადაც უნდა ყოფილიყო მათი ცხედრები დასვენებული, თუმცა იქ არ აღმოჩნდნენ. ამის შემდეგ დამატებითი ინფორმაციის მოძიება მოხდა და შარშან შეხვედრებზე პირველად გაისმა პოზიტიური სიგნალები, რომ დაახლოებით შეიძლებოდა ცნობილი ყოფილიყო, სად იყვნენ ეს ადამიანები გადასვენებული და წელს, გათხრების შედეგად, ეს ინფორმაცია დადასტურდა. ბუნებრივია ეს ყველაფერი არის დადასტურებული ძალიან მაღალტექნოლოგიური კვლევებით და დნმ-ის ანალიზით“, - განაცხადა სოზარ სუბარმა.