2017 წლის ფრანკფურტის წიგნის ბაზრობა გერმანიის კანცლერმა, ანგელა მერკელმა და საფრანგეთის პრეზიდენტმა, ემანუელ მაკრონმა ოფიციალურად გახსნეს.
წლევანდელი წიგნის ბაზრობის საზეიმო გახსნის ცერემონიალს ქართული დელეგაციაც დაესწრო. საზეიმო ცერემონიალის შემდეგ, ქართულმა დელეგაციამ წლევანდელ ქართულ სტენდზე გადაინაცვლა და ასობით უცხოელ გამომცემელსა და წიგნის მოყვარულს უმასპინძლა.
2017 წლის წიგნის ბაზრობის დღეები საქართველოსთვის მნიშვნელოვანია, რადგან მომავალ წელს საქართველო ამ ყველაზე მასშტაბური წიგნის ბაზრობის საპატიო სტუმარია.
საფრანგეთი 2017 წლის ფრანკფურტის წიგნის ბაზრობის 2017 წლის საპატიო სტუმარი ქვეყანაა. ბაზრობის კვირეულის შემდეგ, საპატიო სტუმარი ქვეყნის სტატუსს საფრანგეთი საქართველოს 15 ოქტომბერს საზეიმო ცერემონიაზე გადმოსცემს.
წელს გაიმართება მთავარი პრესკონფერენცია, რომელზე დასასწრებად აკრედიტაცია უკვე გაიარეს მსოფლიოს წამყვანმა მედიასაშუალებებმა.
საქართველო ფრანკფურტის წიგნის ბაზრობაზე წელს მრავალფეროვანი პროგრამით წარდგება. დაგეგმილია 15-მდე სხვადასხვა შინაარსისა და თემატიკის ღონისძიება. პირველად გაიმართება თანამედროვე ქართველი ავტორების ლიტერატურული მარათონი, რომელშიც ისინი საკუთარ უახლეს გერმანულენოვან თარგმანებს წარადგენენ.
დაგეგმილია ქართველი კლასიკოსების - ნიკოლოზ ბარათაშვილის ლექსების კრებულისა და გრიგოლ რობაქიძის „კავკასიური ნოველების“ თარგმანების პრეზენტაციები.
ქართული პროგრამის ფარგლებში, ჩატარდება გერმანია-საქართველოს წლისადმი მიძღვნილი დისკუსია.