დემოკრატიული მოძრაობა – თავისუფალი საქართველო მათი პოლიტიკური ძალის მიმართ განხორციელებულ ზეწოლის ფაქტზე საუბრობს.
დიმიტრი ლორთქიფანიძის განცხადებით, მათი პარტიის წარმომადგენლის გატაცების შემთხვევა, რომელიც გუშინ სენაკში მოხდა, ამის დამადასტურებელია.
პარტიაში ამბობენ, რომ სენაკის 64-ე საარჩევნო ოლქის მე-15 უბნის კომისიის წევრი დემოკრატიული მოძრაობიდან, 21 წლის ანატოლი ღვინჯილია ორმა პირმა ძალის გამოყენებით გაიტაცა და ფიზიკურად გაუსწორდა.
დიმიტრი ლორთქიფანიძის თქმით, დაზარალებულმა სხეულის მრავლობითი დაზიანება მიიღო, რის გამოც ის ქუთაისის რეფერალურ საავადმყოფოშია მოთავსებული.
პარტიის წარმომადგენლის თქმით, დაზარალებულის მამა მათი პარტიის აქტიური წევრია, რაც კიდევ უფრო ადასტურებს ეჭვს, რომ გატაცების ფაქტი პოლიტიკური მოტივით მოხდა.
დემოკრატიული მოძრაობა მომხდარის უმოკლეს დროში გამოძიებას და დამნაშავეების დასჯას ითხოვს.