მუსტაფა ემრე ჩაბუქის დაცვის მხარე ლტოლვილის სტატუსის მინიჭებაზე უარს გაასაჩივრებს, ვიდრე დევნილთა სამინისტრო დადებით გადაწყვეტილებას არ მიიღებს, - ამის შესახებ პირველ არხს დემირელის სკოლის ყოფილი ხელმძღვანელის, მუსტაფა ემრე ჩაბუქის ადვოკატმა ვახტანგ კვიჟინაძემ განუცხადა.

ადვოკატის განმარტებით, სანამ სარჩელის განხილვის პროცედურები მიმდინარეობს, ჩაბუქის თურქეთში ექსტრადირების პროცესი შეფერხებული იქნება და ამ მექანიზმს დაცვის მხარე ბოლომდე გამოიყენებს.

დევნილთა სამინისტროს უარი ლტოლვილის სტატუსის მინიჭებაზე ჩაბუქის ადვოკატებმა თბილისის საქალაქო სასამართლოში გაასაჩივრეს და დღეს სწორედ აღნიშნულ საჩივრის მოსამზადებელი სხდომა მიმდინარეობს.

დღეს დაცვის მხარე მტკიცებულებების ნუსხას წარადგენს, რომლითაც ადვოკატის განმარტებით, დასტურდება, რომ თურქეთში, მძიმე საპატიმრო პირობებია და ჩაბუქის ექსტრადირების შემტხვევაში მისი უფლებები დაირღვევა. მუსტაფა ემრე ჩაბუქი თურქეთში ტერორიზმთან კავშირშია ბრალდებული. თურქეთმა საქართველოს მისი ექსტრადირების თხოვნით მიმართა. ჩაბუქი 24 მაისს დააკავეს და ახლა საექსტრადიციო პატიმრობაში იმყოფება.

7 ივლისს ცნობილი გახდა, რომ საქართველოს დევნილთა სამინისტრომ ლტოლვილის სტატუსის მინიჭებაზე მას უარი უთხრა. ადვოკატის ინფორმაციით, ამის საფუძვლად, უწყებამ თურქეთში, ბოლო დროს გაუმჯობესებული საპატიმრო პირობები დაასახელა. სწორედ სამინისტროს უარია საქალქო სასამართლოში გასაჩივრებული. თუ კი სარჩელი დაკმაყოფილდება, სამინისტროს უარი გაბათილდება და სტატუსის მინიჭების საკითხის განხილვა სოზარ სუბარის უწყებას ხელახლა დაევალება.