ადვოკატების დაკითხვაზე დაბარებას თუ გაბედავენ, დავწვები ევროსაბჭოს მისაღებში და მთელ მსოფლიო პრესას ავალაპარაკებ, - ამის შესახებ ადვოკატთა ასოციაციის თავმჯდომარემ ზაზა ხატიაშვილმა დეკანოზ გიორგი მამალაძის ადვოკატების შესაძლო მაგისტრ მოსამართლესთან დაკითხვის საკითხთან დაკავშირებით განაცხადა.
მისი შეფასებით, თუ პროკურატურა სასამართლოს ამ შუამდგომლობით მიმართავს, ეს იქნება ეჭვქვეშ დაყენება ადვოკატისა და კლიენტის კონფიდენციალურობოს პრინციპის.
ადვოკატთა ასოციაციის თავმჯდომარე პროკურატურის მხრიდან სამარცხვინო ნაბიჯების გადადგმაზე საუბრობს და აცხადებს, რომ ისინი ადვოკატების წინააღმდეგ სადამსჯელო ღონისძიებების ჩატარებას ცდილობენ.
"პროკურატურა გამოვიდა სამართლებრივი შეგნებიდან. ეს არის პირდაპირი დარტყმა ადვოკატის ფუძემდებლურ პრინციპზე და ცდილობენ აიძულონ ადვოკატები გათქვან ინფორმაცია, რაც მათ დაცვის განხორციელებისას მიიღეს. მინდა, გავაფრთხილო პროკურატურა, ამას მოჰყვება ძალიან მწვავე რეაქცია. ეს იგივეა, რომ მღვდელი დაიბარო და აიძულო აღსარების საიდუმლოს გათქმა. ეს დანგრევს მთელ ადვოკატთა კორპუსს, როგორც თავისუფალი პროფესიის განვითარებად", - განაცხადა ხატიაშვილმა.
დეკანოზის ადვოკატები იმედს გამოთქვამენ, რომ პროკურატურა ამ ნაბიჯს არ გადადგამს.
როგორც პაატა მეხრიშვილმა განაცხადა, მათ იცავთ კანონი და ადვოკატთა ეთიკის კოდექსი მათ კონფიდენციალურობოს დაცვას ავალდებულებთ.
“თუკი ასეთი რამ მოხდება, იმედი მაქვს, რომ ქართული მართლმსაჯულება მიიღებს სწორ გადაწყვეტილებას და არ დაუშვებს ჩვენს მიწვევას მოწმის სახით დასაკითხად", - განაცხადა მეხრიშვილმა.