ივანე ჯავახიშვილის სახელობის თბილისის სახელმწიფო უნივერსიტეტში მე-3 საერთაშორისო კონფერენცია, ქართულ-ოსურ ურთიერთობათა განვითარების პერსპექტივები ,,ქართულ-ოსური ურთიერთობები - ისტორია და თანამედროვეობა” მიმდინარეობს.
ღონისძიება აკადემიკოს გიორგი ახვლედიანს და აკადემიკოს ვასილ აბაევს ეძღვნება. კონფერენციის მთავარი მიზანია ხელი შეუწყოს ქართულ-ოსური ურთიერთობების ახალ ეტაპზე გადასვლას. მასში ქართველ მეცნიერებთან ერთან მონაწილეობენ ჰუმანიტარულ მეცნიერებათა სფეროს წარმომადგენლები იტალიიდან, თურქეთიდან, ჩრდილოეთ კავკასიიდან, ყაზახეთიდან და სხვა ქვეყნებიდან.
კონფერენცია ,,კოსტაობა-2017”-ის ფარგლებში ტარდება, რომელსაც სამხრეთ ოსეთის ადმინისტრაცია და თსუ-ს ქართულ-ოსური ურთიერთობების სამეცნიერო-კვლევითი ცენტრი ერთობლივად ახორციელებს.
,,კოსტაობა-2017” გამოჩენილი ოსი პოეტისა და საზოგადო მოღვაწის, ოსური ლიტერატურული ენის დამფუძნებლის კოსტა ხეთაგუროვის 158-ე წლისთავს ეძღვნება.
ღონისძიება სამი დღის განმავლობაში გაგრძელდება, რომლის ფარგლებში იმართება კონფერენცია ვლადიკავკასიდან ჩამოსული სტუმრების მონაწილეობით, ასევე, გაიმართება გამოფენა და თეატრალური მინიატურები ოსური ყოფის თემებზე ეთნოგრაფიულ მუზეუმში და დაგეგმილია, სახალხო ზეიმის გამართვა ლაგოდეხის რაიონ სოფელ არეშფერანში, სადაც მომზადდება ოსური სამზარეულოს კერძები, გაიმართება კონცერტი, დოღი, ჩემპიონატი ჭიდაობაში და სხვა აქტივობები.
ღონისძიებაზე მიწვეულები არიან საქართველოს ხელისუფლების წარმომადგენლები და სტუმრები სამხრეთ ოსეთიდან.
ღონისძიების ერთ-ერთი ორგანიზატორის სამხრეთ ოსეთის ადმინისტრაციის ხელმძღვანელის დიმიტრი სანაკოევის განცხადებით, მსგავსი სახის აქტივობები მნიშვნელოვნად შეუწყობს ხელს ქართულ-ოსური ურთიერთოების გაუმჯობესებას.