კუკავა- ლორთქიფანიძის ბლოკი არჩევნებში გამარჯვების შემთხვევაში "სითი პარკთან" დადებული ხელშეკრულების გაუქმების პირობას დებს. დღეს “დემოკრატიული მოძრაობა – თავისუფალი საქართველოს” ლიდერები დიდუბის მოსახლეობას შეხვდნენ, სადაც დიდუბის, ჩუღურეთისა და დიღმის მაჟორიტარობის კანდიდატების წარდგენის შემდეგ დიდუბელებს "სითი პარკის" პრობლემაზე ესაუბრნენ.

პარტიაში ამბობენ, რომ ხელისუფლების არგუმენტი იმის თაობაზე, რომ კომპანიასთან ხელშეკრულების გაუქმება მერიას ჯარიმას დააკისრებდა, სიმართლეს არ შეესაბამება, რადგან თავის მხრივ კომპანიას არცერთი ნაკისრი ვალდებულება არ შეუსრულებია, რაც მერიას ყოველგვარ კანონიერ უფლებას აძლევდა, ხელშეკრულება გაეუქმებია.

„ბატონმა კალაძემ და ბატონმა ნარმანიამ შეიძლება არ იციან, რომ მაგალითად "სითი პარკს" ევალებოდა დაემონტაჟებინა სპეციალური ეკრანიანი მრიცხველები ავტოსადგომებზე , როგორც ეს არის ევროპის ქვეყნებში. თბილისელებისთვის უნდა დაერიგებინა ელექტრონული ბარათები, რომლითაც ისინი შეძლებდნენ ამ ავტოსადგომზე თავისი მომსახურების მიღებას. მათ ევალებოდათ ახალი ავტოსადგომების მოწყობა, ევალებოდათ დაეყენებინათ ინსპექტორები თითოეულ ავტოსადგომთან, რომლებიც თბილისელებს დაეხმარებნენ პარკირებაში. არც ერთი ასეთი ინსპეტორი არ არის და ძველი ე.წ. „სტაიანშიკები“ ემსახურებიან მანქანის დაყენებაში თბილისელებს. არც ერთი ეს ხელშეკრულებით გათვალისწინებული ვალდებულება "სითი პარკს" შესრულებული არ აქვს, აქედან გამომდინარე, სამოქალაქო კოდექსის 405-ე მუხლის მიხედვით, ხელშეკრულების ერთ მხარეს ყოველთვის შეუძლია გაუწყვიტოს ხელშეკრულების მეორე მხარეს ხელშეკრულება, თუ იგი არ ასრულებს თავის მოვალეობას“,-აღნიშნავს კუკავა.

პარტიაში დარწმუნებულები არიან, პასუხისმგებელი პირები დოკუმენტის შინაარს არ იცნობენ,შესაბამისად გეგმავენ ამ პუნქტების მერიაში გადაგზავნას. უკვე 22 ოქტომბრიდან, კი ხელშეკრულების გაუქმებაზე ზრუნვას. პარტიაში აღნიშნავენ, რომ ვალდებულებები თავის მხრივ არც მერიას აქვს შესრულებუილი, რის გამოც პასუხისმგებლობა ქალაქის მოქმედ და ყოფილ მერებს ეკისრებათ.