კონგოში დატყვევებული ქართველი მფრინავის ოჯახის წევრები და ახლობლები საქართველოს საგარეო საქმეთა სამინისტროსთან მორიგ აქციას მართავენ.
სოსო ოსორაულის ოჯახის წევრები სახელმწიფო კომისიის შექმნას და ოსორაულის ძმის კონგოში ჩასვლას მოითხოვენ.
„არაფერი შეცვლილა, არავინ ინტერესდება ჩემი ძმის ამბით. მოვითხოვთ მოლაპარაკებების გააქტიურებას. მოვითხოვ კონგოში ჩემს წაყვანას ოფიციალურ პირებთან ერთად, რათა ადგილობრივ გენერლებს შევხვდეთ და ადგილზე გავარკვიოთ ცოცხალია თუ არა ჩემი ძმა",- განაცხადა გიორგი ოსორაულმა.
საქართველოს შეიარაღებული ძალების ყოფილი ჯარისკაცი და კონგოს სამხედრო ძალების მფრინავი ადგილობრივმა მეამბოხეებმა 27 იანვარს დაატყვევეს.
მფრინავის კვალს ამ დრომდე ვერ აგნებენ. ვრცელდება ურთიერთგამომრიცხავი ვერსიები. ინტერნეტში გამოქვეყნებული ვიდეო, რომელშიც სოსო ოსორაული ოჯახს მიმართავს, ძველ ჩანაწერად ცხადდება.
ქართული მხარე ახლაც ამოწმებს, რეალურია თუ არა აფრიკიდან მიღებული ინფორმაცია, რომლის მიხედვით ტყვე შეტაკებების დროს დაიღუპა.
ამ ვერსიას უარყოფს ოსორაულის მეგობარი და ყოფილი სამხედრო, რომელიც საკუთარ წყაროებზე დაყრდნობით ამტკიცებს, რომ ქართველი მფრინავი ცოცხალია და ისევ უკანონო დაჯგუფების ტყვეობაში რჩება.