პოლონეთში ამტკიცებენ, რომ ლეხ კაჩინსკის თვითმფრინავზე მომხდარი აფეთქების ხმა ლაინერის შავი ყუთის ჩანაწერებში აღმოაჩინეს.

როგორც პოლონეთის თავდაცვის მინისტრმა ანტონი მაჩიერევიჩმა პოლონური მედიის წარმომადგენლებს უთხრა, ამჟამად მიმდინარეობს ხმოვანი ჩანაწერის ანალიზი.
„კომისიამ ჯერ კიდევ გაზაფხულზე დაადგინა, რომ თვითმფრინავზე აფეთქება მოხდა. ახლა ჩვენ ცოტა უფრო მეტი ვიცით. ერთ-ერთ რეგისტრატორში ვიპოვეთ აფეთქების მომენტი - ის იდენტიფიცირებულია. ახლა მიმდინარეობს ანალიზი, რომ ამ ხმასთან დაკავშირებით სხვა ინტერპრეტაციები გამოირიცხოს", - განაცხადა მაჩიერევიჩმა.
შეგახსენებთ, რომ პოლონეთის პრეზიდენტის ლეხ კაჩინსკის თვითმფრინავი სმოლენსკის აეროდრომზე დაშვების დროს ჩამოვარდა. დაიღუპა 96 ადამიანი, მათ შორის, პოლონეთის მთავრობის მაღალჩინოსნები.

2011 წელს ინციდენტის გამოძიებაზე მომუშავე სახელმწიფოთაშორისო კომისიამ დაასკვნა, რომ კატასტროფა ეკიპაჟის შეცდომამ გამოიწვია.
თუმცა, პოლონეთის მოქმედი მთავრობა ამ დასკვნას არ დაეთანხმა და სმოლენსკის კატასტროფის მიზეზების დასადგენად ალტერნატიული კომისია ჩამოაყალიბა.