ევროკავშირი მოუწოდებს ტრამპს, დაიცვას ირანთან გაფორმებული „ბირთვული შეთანხმება“, რათა აშშ-ისა და მისი მოკავშირეების უსაფრთხოება დაცული იყოს. ამის შესახებ ევროკავშირის წევრი სახელმწიფოების საგარეო საქმეთა მინისტრების შეხვედრის შემდეგ გამოქვეყნებულ განცხადებაშია აღნიშნული.

„ევროკავშირი მიიჩნევს, რომ დონლად ტრამპის უარი აღიაროს თეირანის მიერ ხელშეკრულების პირობების შესრულება, არის აშშ-ის შიდაპოლიტიკური პროცესის ნაწილი. ევროკავშირი მოუწოდებს აშშ-ს შეასრულოს შეთანხმებით ნაკისრი ვალდებულებები და შემდეგი ნაბიჯის გადადგომამდე, გაითვალისწინოს ის შედგები, რომელიც ამას შეიძლება მოუტანოს აშშ-ისა და მისი მოკავშირეების უსაფრთხოებას“, - ნათქვამია ევროკავშირის მიერ მიღებულ განცხადებაში.

შეგახსენებთ, რომ დონალდ ტრამპი გასულ კვირას გამოვიდა ინიციატივით, ირანთან გაფორმებულ „ბირთვულ შეთანხმებაში“ ცვლილებები შევიდეს. კერძოდ, ის დოკუმენტში ირანის მიმართ წაყენებული მოთხოვნების გამკაცრებას ითხოვს. წინააღმდეგ შემთხვევაში, ის არ გამორიცხავს, რომ აშშ-ში შეთანხმებიდან გავიდეს.

„ბირთვული შეთანხმება“ თეირანთან 2015 წელს გაფორმდა. მას ხელი აშშ-მ, ევროკავშირმა, საფრანგეთმა, გერმანიამ, დიდმა ბრიტანეთმა, ჩინეთმა და რუსეთმა მოაწერეს. დოკუმენტის მიხედვით, ირანი ბირთვული პროგრამის შეკვეცას დათანხმდა, საპასუხოდ კი, მას საერთაშორისო სანქციების ნაწილი მოუხსნეს.