ადვოკატთა ასოციაციის საერთაშორისო მდივანმა, დავით ასათიანმა რეგიონში მოქმედ ადვოკატებს ასოციაციის მრავალთვიანი მუშაობის შედეგი გააცნო. სამეგრელოში, აჭარასა და იმერეთში გამართულ შეხვედრებზე ადვოკატებს ჰქონდათ შესაძლებლობა მიეღოთ ინფორმაცია კონსტიტუციაში ასახული და „ადვოკატთა შესახებ“ კანონში განსახორციელებელი ცვლილებების თაობაზე, რაც ადვოკატის პროფესიის გაძლიერებასა და განვითარებას ემსახურება მიზნად.
“საქართველოში ძალიან მალე გვექნება მაღალი დონის კანონი ადვოკატთა შესახებ, რომელიც გააძლიერებს პროფესიაში მიღების პრინციპებს. მათ შორის, იქმნება ადვოკატთა სკოლა, რომელიც რეალურად ახალ სიმაღლეზე აიყვანს ადვოკატთა მომზადებას, პროფესიაში შემომსვლელთა ადაპტაციას; ასევე, მნიშვნელოვნად ძლიერდება ადვოკატთა ასოციაციის ეთიკის კომისიის მუშაობა, მისი ფუნქციონირების სტანდარტები. რაც ყველაზე მთავარია, ადვოკატთა შესახებ საქართველოს კანონში ემატება მუხლი ადვოკატთა პროფესიული დაცულობის შესახებ“- განაცხადა დავით ასათიანმა.