მალტაში ცნობილი ჟურნალისტი, რომელიც პრემიერ-მინისტრს კორუფციაში ადანაშაულებდა, საკუთარ ავტომანქანაში ააფეთქეს. დაფნე კარუანა გალიცია ე.წ. პანამის დოკუმენტებზე მუშაობდა, რომელიც მაღალჩინოსნების მიერ ოფშორში გახსნილი ანგარიშებს აერთიანებს.

პოლიციამ ჟურნალისტის ავტომობილის აფეთქების მიზეზი ჯერ ვერ დაადგინა. აღსანიშნავია, რომ 15 დღის წინ გალიციამ პოლიციას მიმართა და განაცხადა, რომ მას მოკვლით ემუქრებიან.

მალტის პრემიერ-მინისტრმა, ჯოზეფ მუსკატმა მომხდარს „ბარბაროსული თავდასხმა“ უწოდა და განაცხადა, რომ „არ მოისვენებს, სანამ მართლმსაჯულება არ აღსრულდება“. ჯოზეფ მუსკატის თქმით, მალტამ დახმარება აშშ-ის ფედერალურ საგამოძიებო ბიუროს სთხოვა.

53 წლის დაფნე კარუანა გალიციას ბლოგებს ხშირად ქვეყნის მთავარ გაზეთებზე მეტი მკითხველი ჰყავდა.

გალიციამ ერთ-ერთ ბოლო პუბლიკაციაში მალტის პრემიერ-მინისტრ ჯოზეფ მუსკატს და მის ორ თანაშემწეს მალტის პასპორტების გაყიდვაში დასდო ბრალი. როგორც ის ამტკიცებდა, დოკუმენტების გაყიდვიდან მიღებული თანხა პრემიერისა და მისი თანაშემწეების ოფშორულ ანგარიშზე აზერბაიჯანის ხელისუფლებამ ჩარიცხა.

საინტერესოა ის ფაქტიც, რომ ჟურნალისტის ბრალდებებმა ევროკავშირშიც გამოიწვია შეშფოთება. ამის მიზეზი მალტის პრემიერ-მინისტრის მეუღლის გარშემო აგორებული სკანდალი გახდა. ჟურნალისტის მტკიცებით, მას პანამური ნავთობკომპანიის ანგარიშზე ფულს აზერბაიჯანის პრეზიდენტის ქალიშვილი ურიცხავდა.

ჟურნალისტის გარდაცვალებას შოკისმომგვრელი ფატი უწოდა ევროკომისიის ვიცე-პრეზიდენტმა, ფრანს ტიმერმანსმაც.

„თუ ჟურნალისტებს აჩუმებენ, ჩვენ თავისუფლებას ვკარგავთ“, - წერს ტიმერმანსი „ტვიტერში“.