ლიბიაში დაკავებული სამი ქართველი მეზღვაურის სასამართლო პროცესი მოულოდნელად, რამდენიმე საათის წინ გაიმართა. ახლობლების ინფორმაციით, პროცესი 17 ოქტომბრისთვის იყო დანიშნული, თუმცა რამდენიმე საათის წინ ერთ-ერთი დაკავებული, რომა კაკალაძე ოჯახის წევრებს დაუკავშირდა და აცნობა, რომ პროცესზე მოულოდნელად წაიყვანეს.

ოჯახის წევრების ინფორმაციით, დაკავებულთათვის უცნობია, რას შეეხებოდა სასამართლოზე საუბარი ან მიიღო თუ არა მოსამართლემ რაიმე გადაწყვეტილება.

ახლობლები ხელისუფლებისგან დახმარებას ითხოვენ. ისინი ამტკიცებენ, რომ ქართველ მეზღვაურებს არც თარჯიმანი ჰყავთ და არც რეალური ადვოკატი.

„დღეს ჩატარებულა სასამართლო, თვითონაც არ ელოდებოდა, ხვალისთვის იყო ჩანიშნული. უნდა ყოფილიყო სამი ადვოკატი, როგორც საქართველოს ხელისუფლება დაგვპირდა და უნდა ყოფილიყო თარჯიმანიც. თუმცა აღმოჩნდა, რომ მხოლოდ ერთი ადვოკატი ჰყავთ, რომელიც გემთმფლობელმა კომპანიამ დაიქირავა. ადვოკატი საერთოდ არ შეხვედრია თავისი დაცვის ქვეშ მყოფებს და არაფერი გამოუკითხავს. 10 წუთის წინ ველაპარაკე ჩემს ძმას, აზრი ვერ გამოიტანეს, რატომ იყვნენ სასამართლოზე მისულები“, - აცხადებს რომა კაკალაძის და სალომე კაკალაძე.

ლიბიაში, ტანზანიის დროშის ქვეშ მცურავი თურქული გემი 30 აგვისტოს დააკავეს. დაკავებული მეზღვაურებიდან სამი (გენადი კომახიძე, ნუკრი ხოხბა და რომა კაკალეძე) ქართველია, მათ შორის ერთი გემის კაპიტანია. განვცელებული ინფორმაციით, ისინი ლიბიის ციხეში საზღვრის უკანონო კვეთისა და კონტრაბანდული ტვირთის გადაზიდვის ბრალდებით იმყოფებიან.