კიევში პოლიტიკური რეფორმების გატარების მოთხოვნით მასშტაბური საპროტესტო აქცია სამართალდამცველებთან შეტაკებებში გადაიზარდა.
დაშავებულია სულ მცირე სამი ადამიანი მათ შორის ერთი სამართალდამცველია, რომელსაც თავის არეში ტრავმა აქვს მიყენებული.
პოლიციასთან დაპირისპირება კონსტიტუციის მოედანზე კარვების შეტანის მცდელობას მოჰყვა, რისი საშუალებაც მათ სამართალდამცველებმა არ მისცეს. შედეგად აქტივისტები პარლამენტის შტურმით აღების მუქარით გამოვიდნენ. პოლიციამ მათ მოგვიანებით კარვების გაშლის ნება დართო.
დემონსტრაციის ორგანიზატორი სხვადასხვა პოლიტიკური ჯგუფია, მათ შორის „სამაპომოში“ და „ბატკივშინა“ ასევე „ახალი ძალების მოძრაობა“, რომელიც ოდესის ყოფილი გუბერნატორის, მიხეილ სააკაშვილის დაფუძნებულია. ის მხარდამჭერებს მოუწოდებს გამარჯვების გარეშე არ დაიშალონ.
აქციის ორგანიზატორებს 3 ძირითადი მოთხოვნა აქვთ: რეფორმების განხორციელება არჩევნების შესახებ კანონში ღია პარტიული სიების შემოღებით, დეპუტატების ხელშეუხებლობის იმუნიტეტის გაუქმება და უკრაინის ანტიკორუფციული სასამართლოს ჩამოყალიბება.