ერთი პოლიციელი მირტყამდა, მეორე მაგინებდა, - ეს განცხადება "საქართველოს პატრიოტთა ალიანსის" მაჟორიტარობის კანდიდატმა ბეჟან გუნავამ საკუთარ სასამართლო პროცესზე გააკეთა.

გუნავას განმარტებით, პოლიციელებმა უფლებამოსილებას გადაამეტეს და ის უკანონოდ დააკავეს.

"ჯერ გვერდებში მირტყამდნენ. ექსპერტიზის პასუხი ამის თაობაზე მალე იქნება, ჩალურჯებული მქონდა ყველაფერი. მერე ვიღაცამ თქვა, დააკავეთო და 100 მეტრი მათრიეს, ფეხსაცმელი გამძვრა და ისე ჩამტენეს მანქანაში", - აღნიშნა პროცესზე გუნავამ.

ფაქტს უარყოფს საპატრულო პოლიციის წარმომადგენელი, რომელმაც გუნავა დააკავა. პოლიციელის განმარტებით, გუნავა აგრესიულობით გამოირჩეოდა. მან პარტიის წევრი რამდენჯერმე გააფრთხილა, რომ ის სამართალდარღვევას სჩადიოდა, რის შემდეგაც დააკავა.

ბეჟან გუნავა 20 სექტემებერს, "პატრიოტთა ალიანსის" მიერ მოწყობილ შიმშილობის აქციაზე დააკავეს. მას ადმინისტრაციულ სამართალდარღვევათა კოდექსის 173-ე მუხლს ედავებიან, რაც პოლიციელისათვის წინააღმდეგობის გაწევას გულისხმობს.