საქართველოს საგარეო საქმეთა მინისტრის მიხეილ ჯანელიძის განცხადებით, კონგოს დემოკრატიულ რესპუბლიკაში მეამბოხეების ტყვეობაში მყოფი იოსებ ოსორაულის გარდაცვალების შესახებ მტკიცებით ფორმაში საუბრის საშუალება არ არსებობს. როგორც ჯანელიძემ პირველ არხს განუცხადა, კონგოში მიმდინარეობს საბრძოლო ოპერაციები, რაც ართულებს ინფორმაციის მიღებას.

„აქციის შემდეგ ჩვენ გავაკეთეთ განცხადება. განცხადებაში აღწერილია საქართველოს საგარეო საქმეთა სამინისტროს მიდგომები და დამოკიდებულება. ვიზიარებთ ოჯახის მწუხარებას და შეშფოთებას, რომ არ არის საბოლოო დასტური მისი გარდაცვალების შესახებ.

კონგოში მიმდინარეობს საბრძოლო ოპერაციები, რაც ართულებს ინფორმაციის მიღებას. ის ფაქტები, რაც გვაქვს, გაზიარებულია ოჯახის წევრებთან და ყველა დაინტერესებულ პირთან.

თუმცა, ის რაც გვაქვს, არ გვაძლევს საშუალებას, მტკიცებით ფორმაში ვისაუბროთ ოსორაულის გარდაცვალების შესახებ. მუშაობის პროცესს ვაგრძელებთ“, - განაცხადა მიხეილ ჯანელიძემ.

მეამბოხეებმა კონგოს დემოკრატიული რესპუბლიკის სამხედრო-საჰაერო ძალების ორი შვეულმფრენი 27 იანვარს ჩამოაგდეს. ერთ-ერთ შვეულმფრენს საქართველოს მოქალაქე იოსებ (სოსო) ოსორაული მართავდა, რომელიც ტყვედ აიყვანეს. ვრცელდება ინფორმაცია, რომ შესაძლოა, ის მოკლულია.