ნებისმიერ ადამიანს, ვინც არის საქართველოს მოქალაქე, მიუხედავად მისი რელიგიური მრწამსისა, აქვს უფლება ჰქონდეს პასიური საარჩევნო უფლება, - ასე ეხმაურება ცესკო-ს თავმჯდომარე თამარ ჟვანია, მმართველი გუნდის მიერ ხულოს მაჟორიტარობის კანდიდატად იმამის წარდგენას. რაც შეეხება ეჭვებს იმის თაობაზე, რომ ეს ნაბიჯი სეკულარული სახელმწიფოს პრინციპების დარღვევაა, ცესკო-ს თავმჯდომარე აღნიშნავს, რომ ეს არანაირად არ უკავშირდება საარჩევნო კანონმდებლობასა და ადამიანების საარჩევნო უფლებების საკითხს.

ცესკო-ს თავმჯდომარე ხელვაჩაურის 83-ე საოლქო საარჩევნო კომისიაში გაჩენილ ხანძარსაც გამოეხმაურა, სადაც გავრცელებული ინფორმაციით, ხანძრის დროს 46 საარჩევნო უბნის ინვენტარი იყო განლაგებული. ჟვანია ამბობს, რომ ცესკო ამ ოლქში არჩევნებისთვის ორგანიზაციულად მზადაა.

„ძალიან მნიშვნელოვანია, რომ საარჩევნო ადმინისტრაციას ყოველთვის აქვს რისკების გეგმა. ამ შემთხვევაშიც ჩვენ მზად აღმოვჩნდით რისკებისთვის. საარჩევნო ოლქში დაიწვა ფოტოგადამღები, და ასლგადამღები მანქანები. ამავდროულად იქ იყო ამომრჩევლის ხმის მიცემის კაბინები და კიდევ სხვა გარკვეული მასალა. ყველაფერი არის ჩანაცვლებადი არსებული რესურსების გათვალისწინებით. შესაბამისად, ჩვენ არ დაგვჭირდება არანაირი დამატებითი ხარჯის გაწევა. ორგანიზაციულად მზად ვართ ხელვაჩაურში არჩევნებისთვის", -აღნიშნა თამარ ჟვანიამ.