ევროინტეგრაციის საკითხებში ყოფილ სახელმწიფო მინისტრ ალექსი პეტრიაშვილზე თავდასხმის საქმეზე მსჯავრდებულ ლევან მექვაბიშვილთან საპროცესო შეთანხმება გაფორმდა.

აღნიშნულ ინფორმაციას პროკურატურა ადასტურებს. უწყების ცნობით, მექვაბიშვილს სასჯელი შეუმცირდა.

როგორც პროკურატურაში აცხადებენ, საქმეზე მსჯავრდებულ ლევან მექვაბიშვილთან საპროცესო შეთანხმება დაზარალებულთან შეთანხმებით გაფორმდა.

ასევე პროკურატურის განცხადებით, სააპელაციო სასამართლოში შეთანხმება გაფორმდა იმის გათვალისწინებითაც, რომ ლევან მექვაბიშვილმა აღიარა დანაშაული და დაზარალებულს შეურიგდა.

ოფიციალური ინფორმაციით, სასჯელის ზომად მექვაბიშვილს შვიდი წელი განესაზღვრა, საიდანაც სამ წელს სასჯელაღსრულების დაწესებულებაში, ხოლო ოთხ წელს პირობითი სახით მოიხდის.

ევროინტეგრაციის საკითხებში ყოფილ სახელმწიფო მინისტრ და პარტია „თავისუფალი დემოკრატების“ ყოფილ წევრზე ალექსი პეტრიაშვილზე თავდასხმა 2016 წლის თებერვალში მოხდა. ამ საქმეზე ლევან მექვაბიშვილი მომხდარიდან 10 დღეში ბორჯომში დააკავეს. მას 2016 წლის 15 ნოემბერს სასამართლომ 12-წლიანი პატიმრობა მიუსაჯა.

საქალაქო სასამართლომ დაკავებული ჯგუფურად, განსაკუთრებული სისასტიკით პეტრიაშვილისთვის ჯანმრთელობის განზრახ მძიმე ხარისხის დაზიანების მიყენებაში დამნაშავედ ცნო.

გამოკვლეული მტკიცებულებებით, სასამართლომ დადასტურებულად მიიჩნია, რომ 26 თებერვალს უნივერსიტეტის ქუჩაზე მდებარე ძმათა სასაფლაოზე მექვაბიშვილი და გამოძიებით დაუდგენელი პირი პოლიტიკოსს თავს დაესხნენ და განსაკუთრებული სისასტიკით, ჯგუფურად, მეტალის ჩაქუჩითა და ე.წ. ბეისბოლის ჯოხით სცემეს და ცეცხლსასროლი იარაღიდან მრავალჯერადი გასროლის შედეგად სიცოცხლისთვის სახიფათო მძიმე დაზიანებები მიაყენეს, შემდეგ კი შემთხვევის ადგილიდან მიიმალნენ.