ყველაზე შემაშფოთებელ ტენდენციად ზეწოლა-მუქარის ფაქტების დრამატული ზრდა მიგვაჩნია, - ეს განცხადება “სამართლიანი არჩევნების“ ხელმძღვანელმა მიხეილ ბენიძემ ადგილობრივი თვითმმართველობის არჩევნებამდე ბოლო შუალედური ანგარიშის პრეზენტაციაზე გააკეთა.
როგორც მიხეილ ბენიძემ აღნიშნა, ასეთი რაოდენობით ზეწოლა-მუქარის ფაქტები ბოლო წლების არჩევნებზე ჯერ არ ყოფილა და ეს საყურადღებოა.
"ზეწოლა მუქარის კონტექსტში კანდიდატურების მოხსნის ტენდენცია მნიშვნელოვანია. ჩვენ აღვრიცხეთ თეთრიწყაროს შემთხვევა, სადაც “ევროპული საქართველოს” სია და მერობის კანდიდატი პრაქტიკულად მთლიანად რეგისტრაციიდან მოიხსნა. გარდა ამისა, ბორჯომსა და ხულოში "ნაციონალური მოძრაობის" მაჟორიტარობის კანდიდატებმა კანდიდატურები მოხსნეს. სხვადასხვა პარტიისა და დამოუკიდებელმა კანდიდატებმა ჯამში საკუთარი კანდიდატურები ექვს საარჩევნო ოლქში მოხსნეს. ორ შემთხვევაში კანდიდატები დაშინებაზე საუბრობენ. გარდა ამისა, ოპოზიციური პარტიების მხარდამჭერბისა და აქტივისტების მიმართ არის განხორციელებული ზეწოლა, პოლიტიკური აქტივობის შეწყვეტის მოთხოვნით. ასევე მოწოდებებია საჯარო მოხელეების, ბაღებისა თუ სკოლების პედაგოგების მიმართ, რომ მათ საქმიანობა მმართველი პარტიის სასარგებლოდ უნდა გასწიონ და მათ აგიტაციაში ჩაერთონ. წინასაარჩევნო პერიოდი ამ ეტაპზე მშვიდია და ძალადობრივი ინციდენტებით განსაკუთრებულად დატვირთული არ არის, მაგრამ ისეთი დარღვევები მომრავლდა, რომელიც წინასაარჩევნო პერიოდზე სერიოზულ გავლენას ახდენს. კენჭისყრის დღის მოახლოებასთან ერთად, კანონმდებლობის დარღვევის ისეთი ფაქტები გახშირდა , რომელიც საარჩევნო სუბიექტებისთვის თანასწორ და თავისუფალ წინასაარჩევნო გარემოს საფრთხეს უქმნის",- განაცხადა მიხეილ ბენიძემ.
მისივე თქმით, "სამართლიანმა არჩევნებმა" საარჩევნო ადმინისტრაციის კუთხით გამოვლენილი დარღვევებიც შეისწავლა.
"ჩვენ ვხედავთ, რომ საარჩევნო ადმინისტრაცია სოციალური ქსელების მეშვეობით სამუშაო საათებში საჯარო მოხელეების აგიტაციის ფაქტებზე ადეკვატურ რეაგირებას ვერ ახდენს. ეს პრობლემაა, რადგან მომავალში მსგავსი სახის დარღვევებს ახალისებს. სამტრედიის ოლქში ერთი შემთხვევა დაფიქსირდა, სადაც საოლქო კომისიამ საარჩევნო კოდექსის 91-ე პრიმა მუხლი დაუსაბუთებლად გამოიყენა, რამაც შესაძლოა, საარჩევნო პროცესის ადეკვატურად დაკვირვების შეზღუდვის საფრთხე შექმნას. ცესკო-ს ამ ფაქტებზე ადეკვატური რეაგირებისკენ მოვუწოდებთ", -განაცხადა ბენიძემ.
"სამართლიანმა არჩევნებმა” საანგარიშო პერიოდში ზეწოლა/მუქარის 23 ფაქტი, სამსახურიდან სავარაუდოდ პოლიტიკური ნიშნით გათავისუფლების ერთი, ძალადობის ორი, წინასაარჩევნო კამპანიისთვის ხელის შეშლის სამი, ადმინისტრაციული რესურსის გამოყენების ექვსი, შენობა-ნაგებობების არამართლზომიერი გამოყენების ერთი, აგიტაციაში კანონდარღვევით მონაწილეობის ექვსი, სააგიტაციო მასალების დაზიანების 11 შემთხვევა, ასევე საარჩევნო ადმინისტრაციაში არსებული გადაცდომების ექვსი ფაქტი დააფიქსირა.
“სამართლიანი არჩევნების" ბოლო, მე-3 შუალედური ანგარიში 26 სექტემბრიდან 16 ოქტომბრამდე პერიოდს მოიცავს. ორგანიზაცია საბოლოო ანგარიშს არჩევნების შემდეგ გამოაქვეყნებს.