დადებითი ტენდენციები ქართულ მედიაში, თუმცა საარჩევნო პერიოდში კრიტიკული მსჯელობის ნაკლებობა, - ასეთია 2017 წლის საქართველოს ადგილობრივი თვითმმართველობის არჩევნების მედიაში გაშუქების კვლევის პირველადი შედეგები.
დასკვნა ევროკავშირისა და გაერო-ს განვითარების პროგრამის ხელშეწყობით მომზადდა. კვლევის მიხედვით, 19 ივნისიდან 8 ოქტომბრამდე პერიოდში, როგორც ცენტრალურ, ასევე რეგიონულ მედიაში მედიამონიტორინგმა გამოავლინა არჩევნების გაშუქების ხარისხის ზრდა წინა საარჩევნო ციკლებთან შედარებით.
ტოქ-შოუების უმეტესობაში კვლავ შეიმჩნეოდა წინასაარჩევნო პროგრამების შესახებ კრიტიკული დისკუსიის ნაკლებობა. ზოგადი გაუმჯობესების მიუხედავად, რამდენიმე სამაუწყებლო და ბეჭდურ მედიაში გამოვლინდა პოლიტიკური მიკერძოება და სიძულვილის ენის გამოყენების შემთხვევები. ისევე როგორც წინა წლებში, ინტერნეტმედიაში არ იყო მკაფიოდ გამიჯნული სარედაქციო და სარეკლამო კონტენტი.