ამერიკის სავაჭრო-საინვესტიციო მისიის ფარგლებბში, საქართველოს მსხვილი ამერიკული კომპანიების 12 სხვადასხვა სფეროს წარმომადგენელი ეწვია.

კომპანიის წარმომადგენლები შეხვედრას გამართავენ ქართველ პარტნიორებთან და მთავრობის წარმომადგენლებთან. ასევე, მისიის ფარგლებში, სამშენებლო, ლოჯისტიკის საკომუნიკაციო და ტექნოლოგიების სექტორში მომუშავე კომპანიები 100-ზე მეტ შეხვედრას გამართავენ, საქართველოში ვაჭრობის გაძლიერებისა და სამომავლო ინვესტიციების მოზიდვის მიზნით.

ასევე, 20 ოქტომბერს, გაიმართება შეხვედრა ქართული ბიზნესის 150-მდე წარმომადგენელთან. შეხვედრის შემდეგ კი, დაზუსტდება თუ რომელ სფეროებში აქვთ ამერიკულ კომპანიებს ინვესტიციების განხორციელების სურვილი.

ღონისძიების მნიშვნელობაზე ისაუბრა ამერიკის ელჩმა საქართველოში, იან კელიმ. მისი თქმით, ამერიკული კომპანიების ინტერესი საქართველოს მიმართ მზარდია.

„ამ სავაჭრო მისიაში წარმოდგენილია 12 სხვადასხვა მსხვილი კომპანია, რომელიც შეისწავლის ინვესტიციის შესაძლებლობებს სხვადასხვა მიმართულებით. ზოგადად, ამ კომპანიების სპექტრი და სამუშაო არეალი არის საკმაოდ ვრცელი და სწორედ ამის გამო, ამ კომპანიებისთვის საქართვრლოს პოტენციალი არის საინტერესო. ეს სავაჭრო მისია არის ნაწილი ჩვენი მცდელობისა, რომ მოხდეს ცნობიერების ამაღლება საქართველოს ბაზრის მიმართ. უნდა წარმოჩინდეს, თუ როგორი კარგი საინვესტიციო გარემოა საქართველოში და როგორი მარტივია ბიზნესის კეთება. საქართველოს ამ მიმართულებებით, საკმაოდ მაღალი რეიტინგები აქვს. ჩვენ ვმუშაობთ, რომ შემდგომ მოხდეს ანალოგიური ქართული მისიის გამგზავრება ამერიკაშიც“, - განაცხადა იან კელიმ.

ეკონომიკისა და მდგრადი განვითარების მინისტრი, გიორგი გახარია კი აქცენტს სამომავლო პერსპექტივაზე აკეთებს და ამბობს, რომ ორ ქვეყანას შორის ურთიერთობის გაღრმავებაზე ქართული მხარე აქტიურად მუშაობს.

„რა თქმა უნდა, ყველა სახის შეხვედრა ჩვენი სტრატეგიული პარტნიორის ბიზნესის და ეკონომიკის წარმომადგენლებთან არის ძალიან მნიშვნელოვანი. ჩვენ ამერიკის შეერთებულ შტატებთან გვაქვს სანიმუშო ურთიერთობები და დღეს უკვე დროა უფრო მეტად ვიფიქროთ ეკონომიკურ ნაწილზე, განსაკუთრებით ვაჭრობაზე. ეს არის ამ მიმართულებით გადადგმული პირველი ნაბიჯები. ვგეგმავთ, რომ ასეთი შეხვედრები გახდეს უფრო ინტენსიური და იმედი გვაქვს, რომ სავაჭრო ურთიერთობები დღითი დღე, წლიდან წლამდე გაიზრდება“, - აღნიშნა გიორგი გახარიამ.