პირველი ივნისიდან პირველ ოქტომბრამდე პერიოდში თვითმმართველობის არჩევნებისთვის კვალიფიციურმა საარჩევნო სუბიექტებმა და თბილისის მერობის დამოუკიდებელმა კანდიდატმა ალეკო ელისაშვილმა მთლიანობაში 10 319 998 ლარის შემოწირულობა მოიზიდეს, - ასეთია "საერთაშორისო გამჭვირვალობა -საქართველოს" მიერ წარმოდგენილი კვლევის შედეგები.

კვლევის მიხედვით, მთლიანი შემოწირულობების 93% მმართველმა პარტიამ აიღო, რაც 12-ჯერ მეტია დანარჩენი 14 კვალიფიციური სუბიექტის ჯამურად მიღებულ თანხაზე.

საერთო ჯამური შემოწირულობიდან 8 274 776 ლარი 643 ფიზიკური პირის მიერ გაღებული თანხაა, ხოლო 2 044 143 ლარი - 32 იურიდიული პირის მიერ.

"საერთაშორისო გამჭვირვალობა-საქართველოს" ინფორმაციით, ჯამური თანხის უდიდესი ნაწილი 9 553 178 ლარი მიიღო "ქართულმა ოცნებამ", შემდეგ მოდის "ევროპული საქართველო" - 609 969 ლარით, შემდეგია "ერთიანი ნაციონალური მოძრაობა" - 48 261 ლარით, "პატრიოტთა ალიანსი" - 28 187 ლარი და ალექსანდრე ელისაშვილი - 20 241 ლარი.

კვლევის მიხედვით, 32 იურიდიული პირიდან 31 კომპანია "ქართული ოცნების" შემომწირველია და მხოლოდ ერთმა იურიდიულმა პირმა გაიღო "პატრიოტთა ალიანსის" სასარგებლოდ შემოწირულობა 90 ლარის ოდენობით.