ყველას მოგიწოდებთ, იყოთ აქტიურები, დღეს წყდება ძალიან ბევრი საკითხის ბედი, - ამის შესახებ საქართველოს პრეზიდენტმა გიორგი მარგველაშვილმა თვითმმართველობის არჩევნებზე ხმის მიცემის შემდეგ განაცხადა.
როგორც გიორგი მარგველაშვილმა აღნიშნა, თვითმმართველობის არჩევნებისთვის განკუთვნილ სამივე ბიულეტენზე სხვადასხვა სუბიექტი შემოხაზა.
"ყველას მოგიწოდებთ, იყოთ აქტიურები, დღეს წყდება ბედი ძალიან ბევრი საკითხის, რაც მნიშვნელოვანია. თვითმმართველობის არჩევნებმა უნდა გადაწყვიტოს ბევრი ჩვენი ყოველდღიური პრობლემა და საჭიროება. ამ არჩევანით ჩვენ ვაკეთებთ არჩევანს უკეთეს თვითმმართველობაზე, უფრო ჩართულ თვითმმართველობაზე, სადაც ხალხზე იქნება ბევრად უფრო მეტი ხმა, სადაც ადგილობრივი თვითმმართველობა მოუსმენს იმას, რაც უნდათ მოქალაქეებს თავის უბანში, თავის სოფელში, აქედან გამომდინარე შექმნის უკეთეს ყოფას. თვითმმართველობა ახლა იქმნება და ახალმა არჩეულმა დეპუტატებმა, მერებმა უნდა შეძლონ და ემსახურონ საზოგადოებას. ჩემი ხმა და ის სამი ბიულეტენი, რომელიც მომცეს, გამოვიყენე შემდეგნაირად - ამ სამივე ბიულეტენში სამი სხვადასხვა სუბიექტი შემოვხაზე, ეს იყო ჩემი არჩევანი", - განაცხადა გიორგი მარგველაშვილმა.