"დემოკრატიული მოძრაობის" ერთ-ერთი ლიდერის, დიმიტრი ლორთქიფანიძის განცხადებით, რუსთავში ე.წ. სომხური კარუსელი დაფიქსირდა.

ლორთქიფანიძემ რეგიონებსა და თბილისში დაფიქსირებულ დარღვევებზე ისაუბრა.

მისი განცხადებით, ისნის ოლქის 49-ე უბნის წარმომადგენლის, ნინო ჭეიშვილის განცხადებით, საარჩევნო პროცესის დაწყებისას ხარვეზი გამოვლინდა.

"ამ უბანზე საკონტროლო ფურცელი უბანზე არარეგისტრირებულ ამომრჩეველს შეავსებინეს. ფურცლის ყუთში ჩაგდება ვერ მოასწრეს, აქტის შედგენის და საჩივრის დაწერის შემდეგ საარჩევნო პროცესი აღდგა", - განაცხადა ლორთქიფანიძემ.

მისი თქმით, დარღვევები დაფიქსირდა ზუგდიდში - 14, 18, 21, 32, 49 და 50 უბნებზე, სადაც კარუსელი დაფიქსირდა და მარკირებული პირები ხელახლა შეუშვეს, რაზეც ასევე საჩივარია დაწერილი.

ლორთქიფანიძის თქმით, რუსთავში 55-ე უბანზე ამომრჩეველი მივიდა, ცარიელი ბიულეტენი კონვერტით მანქანასთან მიიტანა, იქ მჯდომს შემოახაზინა და კონვერტი უბანში შეიტანა, რაც ე.წ. სომხურ კარუსელს წარმოადგენს.

ლორთქიფანიძის განცხადებით, რუსთავის 83 საარჩევნო უბანზე პარტიის წარმომადგენელი არ შეუშვეს, რაზეც საჩივარი დაიწერა.

“რუსთავში, სამხედრო სამსახურის უფროსი ლევან ონიანი, რომელიც ახლა "ოცნების" სიის პირველი ნომერია, იბარებენ ახალგაზრდებს დღეს ამ სამსახურში და მიდის ინსტრუქტაჟი, აშინებენ გაწვევით. გარდაბანში - მე-4 მაჟორიტარული ოლქი გახსნილია გამგეობის შენობაში და ვინც შედის, ყველასთან პროპაგანდას ეწევიან", -განაცხადა ლორთქიფანიძემ.

მისი თქმით, ფოთში, კოლხეთის ეროვნული პარკის ადმინისტრაციის შენობაში მე-7 საარჩევნო უბანზე მოქალაქემ სიაში არყოფნის მიუხედავად ხმის მიცემა მოახერხა, მიუხედავად დამკვირვებლის რეაგირებისა მან ხმა მისცა.