დიდუბის მე-8 ოლქის პირველი საარჩევნო უბნიდან თბილისის მერობის დამოუკიდბელი კანდიდატის ალეკო ელისაშვილის ერთი დამკვირვებელი გააძევეს. ამის მიზეზი კი მის მიერ საარჩევნო უბანში ვიდეო გადაღება გახდა. როგორც საუბნო საარჩევნო კომისიის თავმჯდომარემ განაცხადა, ეს ადამიანი უბანზე სამაგიდო სიების ფოტო-ვიდეო გადაღებას აწარმოებდა, რაც არ შეიძლება. გაფრთხილების მიუხედავად მან არ წაშალა მასალა, სწორედ ამიტომ კომისიის წევრებმა მას უბანი დაატოვებინეს.
"ერთ-ერთი დამკვირვებელი ახდენდა სამაგიდო სიების ფოტო-ვიდეო გადაღებას და მოვუწოდეთ, რომ შეეწყვიტა გადაღება, რაზეც უარი განგვიცხადა და მოვთხოვეთ წაეშალა თავისი გადაღებული მასალა. წყობიდან გამოიყვანა კომისიის ყველა წევრი. ყველამ მოვუწოდეთ, დაეტოვიბან უბანი, შევადგინეთ ოქმი, რაზეც კომისიის 13-ვე წევრმა ხელი მოაწერა. მოვთხოვეთ დაეტოვებინა უბანი. სანამ თვითონ არ მოიყვანა იურისტი და თვითონ წაიყვანეს თავისმა წევრებმა. ის ადამიანი აღარ აკვირდება პროცესს, მაგრამ აქ არის მისი მეწყვილე", - განაცხადა საარჩევნო კომისიის თავმჯდომარემ ლალი ყურავამ.
უბანზე ამ დროისთვის რჩება ალეკო ელისაშვილის მეორე დამკვირვებელი. სოსო მჭედლიშვილის თქმით, მისმა მეწყვილემ ვიდეოს გადაღება მას შემდეგ დაიწყო, რაც შეამჩნია, რომ ორი პარტიის წარმომადგენელი რეგისტრანტების ნომრებს იწერდნენ.
"საარჩევნო უბანში რეგისტრატორების უკან იდგნენ ორი პარტიის წარმომადგენლები და იწერდნენ ყველა რეგისტრანტის ნომერს. მე დავუკავშირდი შტაბს და მითხრეს, რომ შეიძლებოდა გადაღება. ჩემმა მეწყილემ გადაიღო, თუმცა რა გადაიღო და რა არა, არ ვიცი, რადგან ერთი პარტიის ორ დამკვირვებელს არ აქვს უფლება ერთდროულად იყვნენ უბანზე შესაბამისად მე აღარ ვიყავი იქ", - განაცხადა სოსო მჭედლიშვილმა.