“ახალი საქართველოს” ახალგაზრდული ორგანიზაციის წევრს გაურკვეველი პირი ფიზიკურად გაუსწორდა.
როგორც არასრულწლოვანი “მოამბესთან” საუბარში აცხადებს, ინციდენტი ბუკიას ბაღში მოხდა, როდესაც პარტიის ფლაერი გოგონას გადასცა, რის შემდეგაც მის თანმხლებ ახალგაზრდა მამაკაცთან სიტყვიერი დაპირისპირება მოხდა, მოგვიანებით კი არასრულწლოვანს ფიზიკური შეურაცხყოფა მიაყენა.
“ახალი საქართველოს” ლიდერი გიორგი ვაშაძე ფაქტთან დაკავშირებით ვაკე-საბურთალოს პოლიციის განყოფილებაში იმყოფებოდა. ვაშაძე ბუკიას ბაღში არსებული კამერების ჩანაწერის დაუყოვნებლივ ამოღებასა და თავდამსხმელის იდენტიფიცირებას ითხოვს. ვაშაძე აცხადებს, რომ მისთვის უცნობია პირის ვინაობა, თუმცა არ გამორიცხა, რომ პირი მმართველი გუნდის აქტივისტია.
"ჩვენს მოხალისეს თავს დაესხნენ ბუკიას ბაღში. მას ხელში ეჭირა ჩვენი ფლაერები და მოუწოდებდა ამომრჩეველს, რომ მისულიყვნენ არჩევნებზე. იქ კამერა არის, ყველაფერი დაფიქსირებულია. დაუყოვნებლივ მოვითხოვთ იმ კამერის ამოღებას და მოვუწოდებ “ქართულ ოცნებას”, მოუწოდეთ თქვენს აქტივისტებს, რომ ძალადობას ცუდი შედეგები მოჰყვება", - აღნიშნა “ახალი საქართველოს” ლიდერმა.
დაზარალებული აღნიშნავს, რომ მისთვის უცნობია თავდამსხმელის ვინაობა, თუმცა მის ამოცნობას შეძლებს.
შსს-ის ინფორმაციით, გამოძიება დაწყებულია 126-ე მუხლით, რაც ძალადობას გულისხმობს.